اسلام آباد: بیرون ملک سے پاکستان پہنچنے والے کورونا پازیٹو افراد کے لیے نئی ہدایات جاری کردی گئی ہیں۔
بیرون ملک سے پاکستان آنے والے مسافروں سے متعلق کورونا ٹیسٹنگ پروٹوکولز میں تبدیلی کی گئی ہے جس کے تحت مثبت کورونا ٹیسٹ والے مسافروں پر دس روز کے لیے حکومتی قرنطینہ سینٹرز میں رہنے کی عائد شرط ختم کردی گئی ہے۔
ترجمان سی اے اے کے مطابق اب کورونا کے مثبت ٹیسٹ والے مسافر اپنے گھروں پر ہی 10 روز کے لیے خود کو قرنطینہ کریں گے۔
سی اے اے کے ترجمان نے بتایا ہے کہ صوبائی اور ڈسٹرکٹ انتظامیہ کو ہوم قرنطینہ کو یقینی بنانے سے متعلق طریقہ کار وضع کرنے کی ہدایت کردی گئی ہے۔
مسافروں سے متعلق دیگر ٹیسٹنگ پالیسی پروٹوکولز آخری حکم نامے کے مطابق لاگو رہیں گے۔
واضح رہے کہ اس سے قبل مسافروں کو کورونا مثبت آنے کی صورت میں ہوٹل یا سرکاری قرنطینہ سینٹرز میں قیام کرنا پڑتا تھا۔ سرکاری سینٹرز سے متعدد افراد کے فرار ہونے کے بھی کئی واقعات رپورٹ ہو چکے ہیں۔
