بالی ووڈ کے سلطان اور دبنگ اداکار سلمان خان آج اپنی 53 ویں سالگرہ منا رہے ہیں۔
سلمان خان نے اسسٹنٹ ڈائریکٹر سے لےکربالی ووڈ کےسلطان بننے کے سفر میں کئی کامیابیوں اور ناکامیوں کا سامنا کیا لیکن ہمت نہیں ہاری اور فلم ’ تیرے نام ‘ کے بعد تو وہ شہرت کی بلندیوں پر پہنچ گئےاور پھر انہوں نے پیچھے مڑکرنہیں دیکھا۔
بالی ووڈ کے دبنگ خان بھارتی ریاست مدھیہ پردیش کے شہراندور میں 27 دسمبر 1965ء کو ناموررائٹر سلیم خان کے گھرپیدا ہوئے اور نام عبدالرشید سلیم سلمان خان رکھا گیا لیکن فلمی دنیا میں وہ سلمان خان کے نام سے مشہور ہوئے۔
سپراسٹار سلمان خان اپنے کیریئرکی شروعات سےبطوررائٹر، ڈائریکٹرکام کرنا چاہتےتھےاورانہوں نے 1988ء میں فلم’ فلک‘ میں اسسٹنٹ ڈائریکٹرکے طور پر کام بھی کیا تھا تاہم وہ فلم باکس آفس پرنہیں چل سکی۔
انہوں نے ڈائریکشن کے شعبے میں ناکامی کےبعد اداکاری کےمیدان میں اپنی قسمت آزمانے کا فیصلہ کیا اور 1988ء میں بننے والی فلم ’ بیوی ہو توایسی ‘ سےاپنےفلمی کیریئرکا آغاز کیا، لیکن پہلی کامیابی انہیں فلم ’میں نے پیار کیا‘ سےملی۔
سلمان خان نے فلم ’ساجن ‘، ’ہم آپ کے ہیں کون ‘، ’ہم دل دے چکے صنم ‘ میں رومانوی کردار نبھا کرعوام کو اپنا گرویدہ بنایا۔
دبنگ خان نے اپنے فلمی کیریئر میں کئی عروج وزوال دیکھے اور ایک وقت ایسا بھی آیا کہ جب کہا جانے لگا کہ اب شاید وہ دوبارہ بڑے پردے پراداکاری کے جوہر نہ دکھا سکیں، لیکن 2003ء میں ریلیز ہونے والی فلم ’تیرے نام ‘ میں انہوں نے اپنی اداکاری سےثابت کردیا کہ فلمی دنیا میں ان کا سفرختم نہیں ہوا یہ تو شروعات ہے۔
بالی ووڈ کےسلطان کی فلم پارٹنر، وانٹڈ، ریڈی، باڈی گارڈ، دبنگ، کک، پریم رتن دھن پایو، بجرنگی بھائی جان، ایک تھا ٹائیگر، دبنگ ٹو، بجرنگی بھائی جان اور سلطان نے دنیا بھر میں کامیابی کے جھنڈے گاڑے۔بھارتی فلم انڈسٹری میں غیرملکی اداکاراؤں کو متعارف کرانے کا سہرا بھی سلمان خان کو جاتا ہے ان میں سے باربی ڈول کتریہ کیف، جیکولین فرنینڈس کا شمار بالی ووڈ کی صف اول کی اداکاراؤں میں ہوتا ہے۔
