ہالی ووڈ اینیمیٹڈ فلم ’دی لائن کنگ’کے لائو ایکشن کا ٹیزر جاری کر دیا گیا ہے۔
ٹیزر میں لائن کنگ کے مرکزی کردار سمبا کی پیدائش کا وقت دکھایا گیا ہے۔ جسے سوشل میڈیا پر خوب پسند کیا جارہا ہے۔ فلم کی کہانی ایک شیر کے بچے اور مستقبل کے کنگ سمبا کی ہے جو اپنی شناخت کی تلاش میں ہوتا ہے۔
ڈزنی نے اپنے ٹوئٹر اکاؤنٹ پر فلم کا پہلا پوسٹر بھی ریلیز کردیا، جس میں دکھایا گیا کہ سمبا اپنے والد موفاسا کی جگہ جنگل کا راجا مقرر ہوگا۔
فلم ’دی لائن کنگ‘ اگلے سال 19 جولائی کو دنیا بھر کے سینما گھروں میں نمائش کے لیے پیش کی جائے گی۔
واضح رہے کہ ڈزنی کی اب تک کئی کامیاب اینی میٹڈ فلموں کے لائو ایکشن ریمیکس ریلیز کیے جاچکے ہیں۔جن میں ’سنڈریلا‘، ’بیوٹی ایند دی بیسٹ‘ اور ’دی جنگل بک‘ شامل ہیں۔یہ تمام فلمیں باکس آفس پر کامیاب ثابت ہوئیں۔واضح رہے کہ فلم ’دی لائن کنگ‘ ڈزنی کی سب سے بڑی ہٹ ہونے والی فلموں میں سے ایک ہے جس نے انیس سو چورانوے میں تقریباً ایک بلین ڈالر کما کر سب کو حیران کر دیا تھا کیونکہ اس وقت کسی بھی فلم کی جانب سے اتنے پیسے کمانا بہت بڑی بات تھی۔ انیس سو چورانوے میں ریلیز ہونے والی اس فلم کو راجر ایلرز اور روب منکوف نے ڈائریکٹ کیا تھا۔
