محکمہ موسمیات نے ملک بھر میں رواں ہفتے مزید بارشوں کی پیشگوئی کی ہے۔
محکمہ موسمیات نے رواں ہفتے کے دوران ملک بھر میں مزید بارشوں کی پیشگوئی کردی ہے، اور بتایا کہ 21 مارچ سے بارش برسانے والا سسٹم ملک میں داخل ہوگا، جو 22 مارچ سے اپنا اثر دکھائے گا۔
محکمہ موسمیات کے مطابق بلوچستان کے اضلاع کوئٹہ، ژوب، قلات، بارکھان، خضدار، زیارت، نصیر آباد، سبی اور جعفر آباد میں گرج چمک کے ساتھ بارش کا امکان ہے۔
محکمہ موسمیات کا کہنا ہے کہ 21 سے 24 مارچ کے دوران پنجاب، اسلام آباد، گلگت اور کشمیر میں بارش کا امکان ہے، جب کہ 21 سے 23 مارچ کے دوران سندھ اور کراچی میں بھی بادل برسنے کی توقع ہے۔
محکمہ موسمیات کے مطابق تیز ہوائیں اور ژالہ باری سے ملک میں کمزور انفراسٹرکچر اور کھڑی فصلوں کو نقصان کا خدشہ ہے، بارش کے دوران سیاحوں کو محتاط رہنے کی ہدایت کی گئی ہے۔
