کراچی: گھوٹکی میں قاتلانہ حملے میں زخمی ہونے والے صحافی نصر اللہ گڈانی کراچی کے نجی ہسپتال میں زندگی کی بازی ہار گئے۔سندھ کے سینئر وزیر شرجیل میمن نے صحافی نصر اللہ گڈانی کے انتقال پر اظہار تعزیت کیا ہے۔
ہسپتال ذرائع نے صحافی نصر اللہ گڈانی کے انتقال کی تصدیق کی ہے۔
یاد رہے کہ نصر اللہ گڈانی کو چار روز قبل میرپورماتھیلو میں نامعلوم افراد نے فائرنگ کر کے زخمی کر دیا تھا جنہیں پہلے علاج کیلئے شیخ زاید ہسپتال رحیم یار خان منتقل کیا گیا تھا، بعد میں وزیرِ اعلیٰ سندھ مراد علی شاہ کی ہدایت پر زخمی صحافی کو علاج کیلئے کراچی کے نجی ہسپتال منتقل کیا گیا تھا۔
صحافی نصر اللہ گڈانی کے انتقال پر صحافیوں، سیاسی، سماجی رہنماؤں اور قوم پرستوں سمیت سول سوسائٹی نے ایس ایس پی آفس کے باہر احتجاجی دھرنا دے دیا۔
دوسری جانب وزیرِ اعلیٰ سندھ مراد علی شاہ نے میرپور ماتھیلو کے صحافی نصراللہ گڈانی کے انتقال پر گہرے دکھ اور تعزیت کا اظہار کیا ہے۔
مراد علی شاہ نے اپنے تعزیتی بیان میں کہا ہے کہ حکومتِ سندھ نے نصر اللہ گڈانی کی زندگی بچانے کیلئے بھرپور اقدامات کئے لیکن اللہ پاک کو یہی منظور تھا، ہم نصر اللہ گڈانی کے انتقال پر ان کے اہلخانہ اور ادارے کے غم میں برابر کے شریک ہیں۔
سندھ کے سینئر وزیر شرجیل میمن نے صحافی نصر اللہ گڈانی کے انتقال پر اظہار تعزیت کرتے ہوئے کہاکہ دکھ کی اس گھڑی میں حکومت سندھ صحافی برادری کیساتھ کھڑی ہے،حکومت سندھ مرحوم صحافی نصراللہ گڈانی کے ورثا کی ہر ممکن امداد کریگی،اللہ تعالیٰ مرحوم کی مغفرت اور ورثا کو صبر جمیل عطا فرمائے۔
