اسلام آباد: صدر مملکت آصف علی زرداری، وزیر اعظم شہباز شریف، چیئرمین سینیٹ سید یوسف رضا گیلانی سمیت دیگر نے گولڈ میڈل جیتنے پر ارشد ندیم کو مبارکباد دی۔
صدر مملکت آصف علی زرداری نے کہا کہ پاکستانی ایتھلیٹ ارشد ندیم پوری قوم کا فخر ہیں۔ ارشد ندیم کی جیت پوری قوم کی جیت ہے۔ فائنل میں شاندار اولمپکس ریکارڈ قائم کرنا، طویل ترین جیولین تھرو کرنا بڑا کارنامہ ہے۔
انہوں نے کہا کہ پیرس اولمپکس میں پاکستان کے لیے تمغہ جیت کر آپ نے ہمارا سر فخر سے بلند کر دیا۔ ارشد ندیم نے اولمپکس جیسے بڑے مقابلے میں پاکستان کا نام روشن کیا۔ اللہ تعالیٰ ارشد ندیم کو مستقبل میں مزید کامیابیوں سے نوازے۔
وزیر اعظم شہباز شریف نے ارشد ندیم کے گولڈ میڈل جیتنے پر پوری پاکستانی قوم کو مبارکباد دی۔ کہا کہ ارشد ندیم نے نہ صرف سونے کا تمغہ جیتا بلکہ اولمپکس کا نیا عالمی ریکارڈ بھی قائم کیا۔
انہوں نے کہا کہ ارشد ندیم نے کوئی بھی فاؤل کیے بغیر دو تھرو 90 میٹر سے زائد فاصلے پر پھینکے۔ جو ان کی شاندار کارکردگی کا منہ بولتا ثبوت ہے۔ ارشد ندیم نے پوری پاکستانی قوم کو ایک بہت ہی خوبصورت تحفہ دیا۔
شہباز شریف نے کہا کہ ارشد ندیم اولمپکس ریکارڈ بنا کر پاکستان اور اولمپکس کی تاریخ میں امر ہو گئے۔ پوری قوم کو ارشد ندیم پر فخر ہے۔ ارشد ندیم کی اولمپکس میں شاندار کامیابی یہ ثابت کرتی ہے۔ کہ مقصد کے لیے سچی لگن ہو تو کامیابی ضرور قدم چومتی ہے۔
چیئرمین سینیٹ یوسف رضا گیلانی نے کہا کہ ارشد ندیم نے اپنی کامیابیوں کا سلسلہ جاری رکھتے ہوئے پاکستان کا نام روشن کیا۔ جیولن تھرو میں ارشد ندیم نے عالمی ریکارڈ قائم کیا جس پر ہمیں فخر ہے۔
وزیر داخلہ محسن نقوی نے کہا کہ شاباش اولمپکس چیمپئن ارشد ندیم شاباش، پوری قوم کو آپ پر فخر ہے۔ ارشد ندیم نے سبز ہلالی پرچم کو بلند کر کے تاریخ ساز اور نا قابل فراموش کارنامہ سرانجام دیا۔ ارشد ندیم کی جیت پاکستان کی فتح ہے جسے ہمیشہ یاد رکھا جائے گا۔
