ہالینڈ کی ملکہ میکسما دو روزہ دورے پر پاکستان پہنچ گئیں، ملکہ میکسما صدر عارف علوی اور وزیراعظم عمران خان کے ساتھ ملاقاتیں کریں گی۔
تفصیلات کے مطابق ملکہ میکسما ترک ایئرلائنز کی پرواز کے ذریعے براستہ استنبول اسلام آباد پہنچیں،ان کے ساتھ چھ رکنی وفد بھی ہے۔
ہوائی اڈے پر دفتر خارجہ اور ڈچ سفارتخانے کے حکام نے ملکہ میکسما کا استقبال کیا،ملکہ میکسیما اقوام متحدہ کے سیکرٹری جنرل کی خصوصی نمائندہ کے طور پر پاکستان کا دورہ کررہی ہیں۔
اپنے دورہ پاکستان کے دوران ملکہ نیدرلینڈز صدر مملکت اور وزیراعظم کے ساتھ ملاقاتیں کریں گی، اس کے علاوہ ملکہ میکسما دورہ پاکستان میں عوامی اور نجی شعبوں کے متعدد شراکت داروں سے بھی ملاقاتیں کریں گی۔
پاکستان نے فنانشل انکلوثن کیلئے حالیہ برسوں میں کئی اقدامات کیے ہیں، ملکہ میکسما مائیکرو پیمنٹ گیٹ وے کی افتتاحی تقریب میں بھی شرکت کریں گی۔ مائیکرو پیمنٹ گیٹ وے اسٹیٹ بینک کا ایک اقدام ہے۔ اس اقدام کا مقصد ملک میں ڈیجیٹل ادائیگیوں کے فروغ اور چھوٹی ادائیگیوں کے نرخ کو کم کرنا ہے۔
ملکہ میکسما 2009ء سے اقوام متحدہ کے سیکرٹری جنرل کی نمائندہ خصوصی برائے انکلوسیو فنانس برائے ترقی ہیں۔
