وزیراعظم عمران خان کےحکم پرگورنرہاؤس پنجاب کی دیواریں گرانےکا کام دوبارہ شروع کردیا گیا ہے، آج کشمیر روڈ والی دیوار گرائی جارہی ہے۔
تفصیلات کے مطابق وزیرِاعظم عمران خان کی ہدایت پر گورنر ہاؤس پنجاب کی بیرونی دیواریں گرانے کا کام دوبارہ شروع کردیا گیا ہے، الحمرا ہال کے سامنے مال روڈ پر گورنر ہاؤس کے جنگلے اتارے جا رہے ہیں۔
دوسری جانب ذرائع کے مطابق گورنر ہاؤس سے گورنر آفس مکمل طور پر ختم کرنے کا حتمی فیصلہ نہیں ہوا، ابھی تک گورنر ہاؤس کی عمارت کے اندرونی حصوں کو درخواست کے ذریعے مخصوص اوقات میں دکھانے کی تجویز ہے۔ گورنر ہاؤس کے باغات سیروتفریح کے لئے پہلے ہی کھولے جا چکے ہیں۔ذرائع کے مطابق وزیراعظم عمران خان کو کمیٹی کی جانب سے موجودہ گورنر ہاؤس میں متعدد اقدامات کی سفارش کی گئی ہے۔ وزیراعظم کی قائم کمیٹی نے گورنر ہاؤس میں میوزیم، آرٹ گیلری اور بوٹینیکل گارڈن کی تجویز دی ہے۔
گورنر ہاؤس سے گورنر آفس ختم ہونے کی صورت میں اس عمارت کا چارج گورنر پنجاب کے پاس رہے گا، اگر گورنر ہاؤس سے گورنر آفس کو ختم کیا جاتا ہے تو پھر ایوان وزیراعلیٰ کی عمارت کو اس مقصد کے لئے استعمال کیا جا سکتا ہے، تمام آپشنز پر ابھی بحث چل رہی ہے، حتمی فیصلہ وزیراعظم عمران خان کریں گے۔
واضح رہے کہ دو روز قبل دورہ لاہور کے موقع پر وزیراعظم عمران خان نے گورنر ہاؤس پنجاب کی دیواریں گرانے کا حکم دیا تھا، جس پر وزیر اطلاعات پنجاب فیاض الحسن چوہان نے اگلے 48 سے 72 گھنٹوں میں گورنر ہاؤ س کی دیواریں گرانے کے فیصلے پر عملدرآمد کرنے کا اعلان کیا تھا۔
.فیاض الحسن چوہان نے لاہور میں میڈیا سے گفتگو کرتے ہوئے کہا کہ گورنر ہاؤس کوئی تاریخی جگہ نہیں بلکہ ایک آفس ہے
