انسپکٹر جنرل (آئی جی) سندھ پولیس رفعت مختار راجہ نے اسٹریٹ کریمنلز کے خلاف اعلان جنگ کرتے ہوئے کراچی کو امن کا گہوارہ بنانے کے عزم کا اظہار کیا ہے۔ انہوں نے غیرقانونی تارکین وطن کو جلد از جلد ڈی پورٹ کرنے کی ہدایت کردی۔
امن وامان کے حوالے سے آئی جی سندھ رفعت مختار راجہ کی زیر صدارت اجلاس ہوا۔
ایڈیشنل آئی جی کراچی اسپیشل برانچ خادم حسین رند نے جرائم کے خلاف شہر میں جاری پولیسنگ اقدامات پر بریفنگ دی، جبکہ غیرقانونی تارکین وطن اور اسمگلنگ سمیت اسٹریٹ کرائمز کی روک تھام پر بھی بریفنگ دی۔
آئی جی سندھ رفعت مختار نے غیرقانونی تارکین وطن کو جلد سے جلد ڈی پورٹ کرنے کی ہدایت کرتے ہوئے کہا کہ غیرقانونی تارکین وطن کے حوالے سے حکومت سندھ سے سفارشات کررہے ہیں۔
ایف آئی اے، نادرا، اے این ایف اور پولیس پر مشتمل جوائنٹ ٹاسک فورس کا قیام سفارشات کا حصہ ہوگا جبکہ مختلف مقامات پر غیرقانونی تارکین وطن کے لیے ہولڈنگ سینٹرز مختص کرنے کی بھی سفارش کی جارہی ہے۔
آئی جی سندھ نے کہا کہ اسٹریٹ کریمنلز کے خلاف اعلان جنگ ہے، اسٹریٹ کریمنلز کا قلع قمع یقینی بنانا ہوگا، ہفتہ وار پروگریس رپورٹ لوں گا، بارڈرز ایریاز اور سرحدی علاقوں سے نقل و حمل پر کڑی نگرانی رکھی جائے، متعلقہ اداروں سے مل کر اسمگلنگ کو ہر حال میں روکا جائے۔
کراچی پولیس چیف خادم حسین رند کا کہنا تھا کہ نئی پولیس ٹیمز میدان میں آگئی ہیں، جرائم اور اس میں ملوث عناصر کے خلاف زیرو ٹالیرینس پالیسی اختیار کر رکھی ہے، کسی بھی کریمنلز کو نہیں چھوڑا جائے گا۔
