اسلام آباد احتساب عدالت نے توشہ خانہ ریفرنس میں نیب کو مسلم لیگ ن کے قائد نوازشریف کا بیان قلمبند کرنے کا حکم دیتے ہوئے سماعت تیس نومبر تک ملتوی کردی۔
تفصیلات کے مطابق احتساب عدالت کے جج محمد بشیر نے توشہ خانہ گاڑیوں سے متعلق نیب ریفرنس کی سماعت کی، آصف علی زرداری، خواجہ عبدالغنی مجید، انورمجید اوریوسف رضا گیلانی کے پلیڈرعدالت پیش ہوئے اور ملزموں کی حاضریاں لگائیں۔
نوازشریف کے وکیل قاضی مصباح نے عدالت میں درخواست دی کہ نوازشریف کا دوران تفتیش بیان ریکارڈ نہیں ہوا، دفاع کا بیان رہتا ہے، عدالت نیب کو نواز شریف کا بیان ریکارڈ کرنے کی ہدایت دے۔
جس پر جج نے کہااس میں کیا مسئلہ ہے، نوازشریف کو بلا کربیان ریکارڈ کرلیں تو نیب پراسیکیوٹر کا کہنا تھا کہ تفتیشی افسرکو بیان ریکارڈ کرنا ہوتا ہے، وہی کریں گے۔
وکیل صفائی نے کہا سوالنامہ دے دیں، ہم جواب دےدیتے ہیں، جس پر نیب پراسیکیوٹر نے کہا ہمیں کوئی اعتراض نہیں۔
عدالت نے نواز شریف کا بیان قلمبند کرنے کی درخواست منظور کرلی اور نیب پراسیکیوٹرکے دفترسے تفتیشی افسر کو تیس نومبر تک نوازشریف کا بیان ریکارڈ کرنے کا حکم دیتے ہوئے کیس کی سماعت30 نومبر تک کیلئے ملتوی کردی۔
