آسٹریلیا نے 3 ٹی ٹی ٹوئنٹی میچوں پر مشتمل سیریز کے پہلے میچ میں بھارت کو 4 رنز سے شکست دے کر سیریز میں 0-1 کی برتری حاصل کر لی ہے۔
برسبین کرکٹ گراؤنڈ میں کھیلے گئے میچ میں بھارتی کپتان ویرات کوہلی نے ٹاس جیت کر پہلے فیلڈنگ کا فیصلہ کیا۔ آسٹریلوی ٹیم کی بیٹنگ کے دوران بارش کے باعث میچ کو 17 اوورز تک محدود کیا گیا تو اس وقت تک آسٹریلین ٹیم نے 4 وکٹوں کے نقصان پر 158 رنز بنائے۔
ڈک ورتھ لوئس میتھڈ کے تحت بھارت کو میچ جیتنے کیلئے 174 رنز کا ہدف ملا جس کے جواب میں بھارتی بلے بازوں نے جارحانہ انداز اپنایا اور مقررہ 17 اوورز میں 7 وکٹوں کے نقصان پر 169 رنز ہی بنا سکے۔
اوپننگ بلے باز روہت شرما صرف 7 رنز بناسکے تاہم شیکھر دھون نے دھواں دھار بیٹنگ کرتے ہوئے 42 گیندوں پر 2 چھکوں اور 10 چوکوں کی مدد سے 76 رنز کی شاندار اننگز کھیلی۔ لوکیش راہول 13، کپتان ویرات کوہلی 4 اور رشب پنت 20 رنز بنا کر آؤٹ ہوئے۔
آسٹریلیا کی جانب سے ایڈم زامپا نے 2 کھلاڑیوں کو پویلین کی راہ دکھائی جبکہ جیسن برنڈروف، بلی سٹین لیک اور اینڈریو ٹائی نے ایک ایک وکٹ حاصل کی۔
