حکومت کی جانب سے پیٹرولیم مصنوعات کی قیمت میں کمی کے بعد ہفتہ وار مہنگائی کی شرح میں بھی معمولی 0.16 فیصد کمی ریکارڈ کی گئی۔
ادارہ شماریات کے اعداد وشمار میں بتایا گیا کہ حالیہ ہفتے کے دوران 19 اشیا کی قیمت میں اضافہ ہوا، 13 اشیا کی قیمت میں کمی جبکہ 19 اشیا کی قیمتوں میں استحکام ریکارڈ کیا گیا۔
رپورٹ میں بتایا گیا کہ رواں ہفتے ٹماٹر کی قیمت میں 40 روپے فی کلو اضافہ ہوا اور ایک ہفتے میں انڈے 13 روپے فی درجن مہنگے ہوئے، لہسن کی قیمت میں 10 روپے 40 پیسے، بیف کی قیمت میں 58 پیسے فی کلو اضافہ ہوا، اسی طرح گڑ، کپڑا، دہی اور دال چنا بھی مہنگی ہونے والی اشیا میں شامل ہیں۔
ادارہ شماریات میں بتایا گیا کہ حالیہ ہفتے کے دوران پیاز7 روپے 17 پیسے فی کلو سستی ہوئی، ایک ہفتے میں آٹے کا 20 کلو کے تھیلے کی قیمت میں 34 روپے 43 پیسے کمی آئی، چکن، کیلے، ایل پی جی، چینی اور آلو کی قیمتوں میں بھی کمی واقع ہوئی ہے۔
