کراچی میں نقل مافیا کے آگے بورڈ آف انٹرمیڈیٹ اینڈ سکینڈری ایجوکیشن انتظامیہ بے بس دکھائی دے رہی ہے ۔ پیپر آؤٹ ہونے کا سلسلہ برقرار ہے ۔ آج بھی انٹر امتحانات میں ایک پرچہ اور آؤٹ ہوگیا ۔
کراچی میں حسب معمول انٹر کا کیمسٹری کا پرچہ آؤٹ ہوگیا ہے۔ پرچہ امتحانی مراکز پر پہنچنے سے پہلے ہی نقل مافیا تک پہنچ گیا۔ انٹر کا کیمسٹری کا پرچہ شروع ہونے سے پچاس منٹ پہلے سوشل میڈیا کی زینت ہی نہیں بنا بلکہ کیمسٹری کے پرچےکے حل شدہ جوابات بھی سوشل میڈیا پر موجود ہیں۔
سندھ بھر میں جاری انٹرمیڈیٹ کے امتحانات میں نقل مافیا کا راج بدستور برقرار ہے اور پرچے کمرہ امتحان میں پہنچنے سے قبل سوشل میڈیا پر آؤٹ ہونے کی شکایات سامنے آرہی ہیں۔
یاد رہے اس سے قبل بھی سکھر بورڈ کے زیرانتظام گھوٹکی میں 22 اپریل کو ہونے والا کمیسٹری کا پرچہ فوٹو اسٹیٹ کی دکانوں پر500 میں فروخت کیا جاتارہا اور سوشل میڈیا پر بنائے گئے گروپس میں بھی دستیاب تھا۔
سندھ کے ضلع گھوٹکی کی تحصیل ڈہرکی میں ہائی اسکول ڈہرکی اور ڈگری کالج میرپورماتھیلو سے کیمسٹری کا پرچہ آؤٹ ہوا۔ انتظامیہ ایڑی چوٹی کا زور لگانے کے باوجود نقل کی روک تھام میں ناکام اور بوٹی مافیا کے سامنے بے بس نظر آرہی ہے۔
