محکمہ موسمیات کے مطابق جمعرات کے روز ملک کے شمالی علاقوں میں موسم شدید سرد اور خشک

محکمہ موسمیات کے مطابق جمعرات کے روز ملک کے شمالی علاقوں میں موسم شدید سرد اور خشک جبکہ دیگر علاقوں میں سرد اور خشک رہے گا۔

ماہرین موسمیات کے مطابق آئندہ دو سے تین روز کے دوران پنجاب کے وسطی اور جنوبی علاقوں میں بعض مقامات پر شدید دھند اور بعض مقامات پر ہلکی دھند کا امکان ہے۔

وفاقی دارالحکومت میں جمعرات کے روز موسم سرد اور خشک رہے گا، شہر میں آج صبح ریکارڈ کیا گیا درجہ حرارت 5 ڈگری سینٹی گریڈ رہا۔

گلگت بلتستان، کشمیر اور خیبرپختونخوا کے بیشتر علاقوں میں موسم شدید سرد اور خشکی کی لپیٹ میں رہے گا۔

محکمہ موسمیات کے مطابق گزشتہ گھنٹوں کے دوران راولپنڈی، لاہور، ساہیوال، بہاولپور، بنوں ڈویژن اور اسلام آباد میں چند مقامات پر بارش اور پہاڑوں پر برف باری ہوئی۔

گزشتہ روز سب سے زیادہ سردی کالام میں پڑی جہاں درجہ حرارت منفی نو ڈگری سینٹی گریڈ ریکارڈ کیا گیا۔