وزیراعظم نئے سال کے پہلے دورے پر 3جنوری کو ترکی روانہ ہونگے

وزیراعظم عمران خان نئے سال کے پہلے دورے پر ترک صدر رجب طیب اردوان کی دعوت پر 3 جنوری سے ترکی کا دو روزہ دورہ کریں گے۔ دفتر خارجہ کے مطابق یہ وزیراعظم عمران خان کا ترکی کا پہلا سرکاری دورہ ہوگا۔

دفتر خارجہ کی جانب سے جاری بیان کے مطابق وزیراعظم عمران خان کے ہمراہ ایک اعلیٰ سطحی وفد بھی ترکی جائے گا، جس میں وزیرخارجہ شاہ محمود قریشی، وزیر منصوبہ بندی خسرو بختیار اور مشیر تجارت عبدالرزاق داؤد بھی شامل ہوں گے۔

دورے کے دوران وزیراعظم عمران خان ترک صدر رجب طیب اردوان سے ملاقات کریں گے جس میں دونوں ممالک کے دوطرفہ تعلقات کے تمام پہلوؤں کے علاوہ علاقائی و بین الاقوامی صورتحال پر تبادلہ خیال کیا جائے گا۔

وزیراعظم عمران خان ترکی میں بزنس فورم سے بھی خطاب کریں گے۔ اس کے علاوہ ترک کاروباری شخصیات اور سرمایہ کاروں سے ملاقاتیں بھی کریں گے۔وزیراعظم کے دورے سے پاکستان اور ترکی کے درمیان تاریخی تعلقات کو اور فروغ ملے گا۔ اس کے علاوہ دونوں ممالک کے درمیان اقتصادی، تجارتی اور کمرشل تعلقات کے شعبے میں تعاون میں اضافہ ہوگا۔