کشمیریوں سے اظہار یکجہتی، شوبز فنکار  جلسے میں شرکت کیلئے مظفرآباد پہنچ گئے

 پاکستان شوبز انڈسٹری سے تعلق رکھنے والے شوبز فنکار جلسے میں شرکت کیلئے مظفرآباد پہنچ گئے۔

وزیراعظم عمران خان نے کشمیریوں سے اظہار یکجہتی کے لیے آج مظفر آباد میں جلسے کا اعلان کیا تھا، پاکستان شوبز انڈسٹری سے تعلق رکھنے والے فنکار بھی کشمیریوں سے اظہار یکجہتی کے لیے مظفر آباد پہنچ گئے۔

نامور پاکستانی اداکار ہمایوں سعید نے اپنے سوشل میڈیا اکاؤنٹ پرایک تصویر شیئر کی ہے جس میں اداکار جاوید شیخ، اداکارہ مایاعلی، حریم فاروق، گلوکار فاخر، ہمایوں سعید اور شاہد آفریدی نظر آرہے ہیں۔ اس تصویر کے ساتھ ہمایوں سعید نے پیغام دیتے ہوئے کہا کہ وزیراعظم عمران خان کے اعلان کے بعد ہم مظفرآباد کی جانب روانہ ہیں، ہم اپنے کشمیری بھائی بہنوں سےاظہار یکجہتی کے لیے جلسے میں شامل ہوں گے۔

اس سے قبل گلوکار شہزاد رائے نے بھی ٹوئٹر پر اپنی اور شاہد آفریدی کی تصویر شیئر کرتے ہوئے کہا تھا کہ وہ مظلوم کشمیریوں سے اظہار یکجہتی کے لیے شاہد آفریدی کے ساتھ مظفر آباد کی جانب روانہ ہوگئے ہیں۔