میں فواد خان کے ساتھ زیادہ جچتی ہوں. سونم کپور

بالی ووڈ اداکارہ سونم کپور نے ایک پروگرام کے دوران کہا ہے کہ وہ اسکرین پر پاکستانی اداکار فواد خان کے ساتھ زیادہ جچتی ہیں۔

بھارتی ٹی وی شو’کافی ود کرن‘ میں ریپڈ فائر مرحلے کے دوران پروگرام کے میزبان نے سونم کپور سے سوال کیا کہ آپ اسکرین پر کس کے ساتھ سب سے زیادہ جچتی ہیں؟

سونم کپور نے پروگرام کے میزبان کرن جوہر کو جواب دیا کہ فواد خان کے ساتھ لیکن آپ نے انہیں واپس بھیج دیا ہے۔ پروگرام میں اداکارہ کی بہن اور بھائی بھی مہمان کی حیثیت سے شریک تھے۔

چند روز قبل فواد خان کی آنے والی پاکستانی فلم مولا جٹ کا ٹریلر دیکھنے کے بعد بھی سونم کپور نے اپنے ٹویٹ میں لکھا تھا کہ فواد خان آپ ایک اسٹار ہو۔

پاکستانی اداکار فواد خان نے بالی ووڈ میں فلمی کیرئیر کا آغاز فلم ’’خوبصورت‘‘ سے کیا جس میں اداکارہ سونم کپور نے ان کے مدمقابل مرکزی کردار اداکیا جب کہ فلم میں دونوں اداکاروں کی اداکاری کو شائقین نے بے حد پسند کیا اور کئی ایوارڈ اپنے نام کیے۔