وزیر اعظم کی زیر صدارت وفاقی کابینہ کا خصوصی اجلاس، چھ وزارتوں کی کارکردگی کا جائزہ لیا جائے گا

وزیراعظم عمران خان کی زیرصدارت وفاقی کابینہ کا خصوصی اجلاس آج ہوگا جس میں 6 وزارتوں اور ڈویژنز کی کارکردگی کا جائزہ لیا جائے گا۔

وزیراعظم عمران خان کی زیرصدارت وفاقی کابینہ کا خصوصی اجلاس وزیراعظم کی رہائش گاہ بنی گالہ میں ہوگا۔ وزیراعظم کو باقی رہ جانے والی 6 وزارتوں اور ڈویژنز کی کارکردگی پر بریفنگ دی جائے گی۔ ان 6 وزارتوں میں ایم کیو ایم کی انفارمیشن ٹیکنالوجی اور جی ڈی اے کی بین الصوبائی رابطہ شامل ہیں۔

وزیراعظم خالد مقبول صدیقی کی وزارت انفارمیشن ٹیکنالوجی اورفہمیدہ مرزا کی وزارت بین الصوبائی رابطہ کی کارکردگی کا جائزہ لیں گے۔ وزیرمملکت مراد سعید اپنی دوسری وزارت پوسٹل سروسز کی کارکردگی بیان کریں گے۔ اجلاس میں وزارت صنعت و تجارت کی کارکردگی کا بھی جائزہ لیا جائے گا۔ وزارت قومی غذائی تحفظ کی کارکردگی پر بھی سوال و جواب کا سلسلہ ہو گا۔

مشیر برائے اسسٹیبلشمنٹ ڈویژن شہزاد ارباب بھی کارکردگی بیان کریں گے۔ وزیر اعظم عمران خان نے 10دسمبر کو کابینہ کے 9 گھنٹے طویل اجلاس میں 26 وزارتوں اور ڈویژنز کی کارکردگی کا جائزہ لیا تھا۔

اس سے قبل گذشتہ روز خیبرپختونخواہ حکومت کی 100 روزہ کارکردگی کی تقریب سے خطاب کرتے ہوئے وزیراعظم عمران خان کا کہنا تھا کہ پاکستانی دنیا میں سب سے زیادہ خیرات اور سب سے کم ٹیکس دیتے ہیں۔ جو بھی حکومت کرے قوم کو اس پر نظر رکھنی چاہیے۔

انہوں نے کہا کہ کرپشن عوام کا پیسہ چوری کر کے کی جاتی ہے۔ صرف اسلام آباد میں قبضہ گروپوں سے ساڑھے تین سو ارب کی زمین چھڑوائی ہے۔ یہ عوام کی زمین ہے جس پر مافیاز نے قبضہ کیا ہوا تھا۔