حکومت کے 100 روز مکمل ہونے پرحاصل کی گئی کامیابیوں پرآج جنا ح کنو نشن سنٹر میں تقریب منعقد کی جا ئے گی۔
وزیراعظم عمران خان تقریب کے مہمانِ خصوصی ہوں گے۔تقریب کا عنوان ’رکھ دی ہے بنیاد نئے پاکستان کی‘ جس سے خطاب میں وزیراعظم عمران خان اپنی حکومت کی کارکردگی پر روشنی ڈالیں گے۔
وزیر اعظم عمران خان خود حکومتی کارکردگی پر قوم کو اعتمادمیں لیں گے۔تقریب میں وزیراعظم پلان میں حاصل کئے گئے اہداف بتائیں گے اس کے علاوہ آئندہ کیلئے حکومتی منصوبوں سے بھی قوم کو آگاہ کریں گے۔
تقریب میں وفاقی کابینہ، پی ٹی آئی ارکان اسمبلی، سینیٹرز اور مختلف شعبوں سے اہم شخصیات شرکت کر یں گے ۔پاکستان تحریک انصاف کو 18 اگست کے دن اقتدار ملا اور اب ان کی حکومت کو سو دن مکمل ہوگئے۔ اقتدار سنبھالنے کے بعد وزیراعظم عمران خان نے اپنی حکومت کے 100 روزہ پلان کا اعلان کیا۔
وزیراعظم نے کابینہ ارکان کو 100 روزہ پلان کے حوالے سے مختلف اہداف دیے۔ تحریک انصاف کی حکومت نے 100 روز میں کیا اقدامات کئے، کون سے منصوبے شروع کئے، اس بارے میں وزیراعظم عمران خان آج اپنی حکومت کے اقدامات سے آگاہ کریں گے۔وزیراعظم معیشت کی بہتری کے لئے اقدامات، 50 لاکھ گھروں کی تعمیر کے منصوبے، کفایت شعاری مہم، سماجی تحفظ پروگرام، خارجہ پالیسی، تعلیمی اصلاحات، احتساب اور لوٹی دولت کی واپسی کے لئے اقدامات سے قوم کو آگاہ کریں گے۔
