کراچی انٹرمیڈیٹ سال اول کے متنازع نتائج کی تحقیقات کے لئے 6 رکنی فیکٹ فائنڈنگ کمیٹی تشکیل دے دی گئی۔
تفصیلات کے مطابق انٹرمیڈیٹ سال اول کے متنازع نتائج کی تحقیقات کے لئے محکمہ کالج ایجوکیشن نے کمیٹی تشکیل دے دی۔
سیکرٹری کالج ایجوکیشن صدف انیس کی جانب سے 6 رکنی فیکٹ فائنڈنگ کمیٹی تشکیل دی گئی اور نوٹیفکیشن جاری کردیا ہے۔
نوٹیفکیشن میں کہا گیا ہے کہ ڈائریکٹر کالجز مصطفی کمال کو کمیٹی کا کنوینئر مقرر کیا گیا ہے ، کمیٹی 7 روز میں رپورٹ سیکریٹری کالجز صدف انیس کو پیش کرے گی۔
یاد رہے انٹر بورڈ سال اوّل کے امتحانی نتائج میں 60 فیصد سے زائد طلبہ و طالبات فیل ہوئے ہیں جو تعلیمی معیار کے حوالے سے بہت زیادہ سنگین صورتحال ہے۔
انٹر پری انجینئرنگ کیٹیگری میں کامیاب طلبا کا تناسب 34.91% ریکارڈ کیا گیا، جو اس بات کی نشاندہی کرتا ہے کہ صرف ایک تہائی طلباء نے اس شعبے میں کامیابی سے اپنے امتحانات پاس کیے ہیں۔
انٹرمیڈیٹ کے امتحان میں فیل ہونے والے طلبا کی بڑی اکثریت کا والدین کے ہمراہ احتجاج جاری ہے، طلبہ کا کہنا تھا کہ انٹر میڈیٹ سال اول کے سالانہ امتحانات میں پری میڈیکل میں صرف 36.51 فیصد جبکہ پری انجینئرنگ میں 34.79 فیصد طلبا ہی کامیاب ہوسکے۔
