لاہور کی سیشن کورٹ نے اشتعال انگیز تقاریر کیس میں کیپٹن ریٹائرڈ صفدر کی درخواست ضمانت مظور کرلی۔
تفصیلات کے مطابق ایڈیشنل سیشن جج تجمل شہزاد نے کیپٹن ریٹائرڈ صفدر کی درخواست ضمانت پر محفوظ فیصلہ سناتے ہوئےانہیں رہا کرنے کا حکم دے دیا۔ عدالت نے لیگی رہنما کو 2 لاکھ کے مچلکے جمع کرانے کی ہدایت کر دی۔
سابق وزیراعظم نواز شریف کے داماد کیپٹن ریٹائرڈ صفدر نے درخواست ضمانت کے لیے عدالت سے رجوع کیا تھا۔ درخواست میں موقف اپنایا گیا تھا کہ انہیں سیاسی انتقام کا نشانہ بنایا گیا، وہ ایک سیاسی شخص ہیں، حکومت کے خلاف تحریک چلانے کی بات کرنا جمہوری حق ہے، اگر اس بیان پر مقدمے درج ہوگئے تو پھر موجودہ حکمرانوں پر بھی مقدمے درج کیے جائیں،کیپٹن (ر)صفدر کو نواز شریف کا داماد ہونے کی سزا دی جارہی ہے۔
