اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے پاک آئی ڈی موبائل ایپ کا نیا ورژن لانچ کر دیا ہے، جس میں اردو مینو سمیت کئی جدید فیچرز شامل کیے گئے ہیں تاکہ شہریوں کو شناختی کارڈ کے اندراجی عمل میں مزید سہولت مل سکے۔
نادرا کے مطابق ایپ کا ورژن 5.0.0 متعارف کرایا گیا ہے جو پاکستان میں مقیم شہریوں کے ساتھ ساتھ بیرون ملک مقیم پاکستانیوں کے لیے بھی دستیاب ہوگا۔ نئے ورژن میں نیا ڈیش بورڈ، بہتر سرچ آپشنز، اور شناختی کارڈ کی منسوخی کا تیز تر نظام شامل کیا گیا ہے۔ اردو مینو خاص طور پر دیہی علاقوں کے صارفین کے لیے متعارف کرایا گیا ہے تاکہ وہ ایپ کو آسانی سے استعمال کر سکیں۔
اہم فیچرز میں ایپ کے اِن باکس کے ذریعے ریئل ٹائم اپلیکیشن ٹریکنگ، یونین کونسلز کے تعاون سے آن لائن ڈیتھ رجسٹریشن، چہرے کی بائیو میٹرک تصدیق، فیملی ریکارڈ تک رسائی، نادرا سینٹرز پر اپوائنٹمنٹ بکنگ، اور اسمارٹ این آئی سی، سی آر سی اور ایف آر سی کی فیسوں کی محفوظ آن لائن ادائیگی شامل ہیں۔
نادرا کا کہنا ہے کہ اب صارفین شناختی کارڈ کے اندراج کا پورا عمل اپنے موبائل فون پر ہی مکمل کر سکیں گے، جس میں سروس کا انتخاب، لائیو فوٹو اور فنگر پرنٹس کیپچر، دستاویزات اپ لوڈ، ڈیجیٹل فیس ادائیگی اور کارڈ کی فراہمی تک ریئل ٹائم ٹریکنگ شامل ہے۔
بیرون ملک مقیم پاکستانیوں کے لیے بھی این آئی سی او پی کی آن لائن درخواست اور تجدید کی سہولت فراہم کی گئی ہے، جس کے بعد کارڈ براہ راست ان کے غیر ملکی پتے پر ارسال کر دیا جائے گا۔
نادرا کے مطابق نیا ورژن بہتر کارکردگی، آسان نیویگیشن اور مکمل پیپر لیس عمل فراہم کرتا ہے۔ عوام کو ہدایت کی گئی ہے کہ وہ اپ ڈیٹ شدہ ایپ ڈاؤن لوڈ کر کے جدید سہولیات سے فائدہ اٹھائیں۔
