کراچی کے علاقے گلستان جوہر بھٹائی آباد میں ڈکیتی کی ایک بڑی کوشش شہری کی حاضر دماغی اور بہادری کے باعث ناکام ہوگئی۔
واقعہ بھٹائی آباد کی گلی نمبر 6 میں اس وقت پیش آیا جب عرفان نامی شہری اپنی اہلیہ کے ساتھ موٹر سائیکل پر گھر پہنچا ہی تھا کہ گھر کے دروازے پر دو مسلح ڈاکوؤں نے انہیں روک کر لوٹنے کی کوشش کی۔ تاہم شہری نے فوری ردعمل دیتے ہوئے ایک ملزم سے پستول چھین لی اور اسی پر فائرنگ کردی۔ نتیجتاً ڈاکو زخمی ہوگیا اور موقع پر ہی قابو میں آگیا جبکہ اس کا دوسرا ساتھی فرار ہونے میں کامیاب ہوگیا۔
ایس ایچ او ملیر کینٹ آغا رشید کے مطابق شہری کی بہادری نے نہ صرف اپنی جان بچائی بلکہ ایک خطرناک ملزم کو گرفتار کرانے میں بھی مدد دی۔ زخمی ڈاکو کو پولیس نے موقع پر گرفتار کر کے طبی امداد کے لیے اسپتال منتقل کردیا، جہاں اس کی شناخت حیدر خان کے نام سے ہوئی۔
پولیس حکام کا کہنا ہے کہ زخمی ملزم کے خلاف مزید تفتیش جاری ہے اور اس کے فرار ہونے والے ساتھی کی گرفتاری کے لیے چھاپے مارے جا رہے ہیں۔
