کولمبیا میں ایک چھوٹا طیارہ گر کر تباہ ہو گیا، جس کے نتیجے میں طیارے میں سوار تمام 15 افراد جان کی بازی ہار گئے۔ یہ افسوسناک واقعہ ملک کے مشرقی سرحدی علاقے میں پیش آیا، جس کے بعد امدادی اور تفتیشی کارروائیاں شروع کر دی گئیں۔
غیر ملکی میڈیا رپورٹس کے مطابق 15 افراد کو لے جانے والا یہ طیارہ وینزویلا کے ساتھ مشرقی سرحد کے قریب ایک پہاڑی علاقے میں پرواز کے دوران لاپتہ ہو گیا تھا، جس پر فضائی حکام نے فوری طور پر تلاش کا عمل شروع کیا۔
ایئر ٹریفک کنٹرول حکام نے بتایا کہ کوکوٹا سے اوکانا جانے والی اس پرواز سے لینڈنگ سے کچھ دیر قبل رابطہ منقطع ہو گیا تھا، جبکہ کچھ وقت بعد طیارے کے تباہ ہونے کی تصدیق ہو گئی۔
حکام کے مطابق طیارے میں کولمبیا کی کانگریس کے ایک نمائندے سمیت 13 مسافر اور 2 کریو ممبرز سوار تھے۔ حادثے کے بعد تمام افراد کے ہلاک ہونے کی تصدیق کر دی گئی ہے۔
ابتدائی طور پر خراب موسمی حالات کو اس حادثے کی ممکنہ وجہ قرار دیا جا رہا ہے، تاہم حکام کا کہنا ہے کہ حادثے کی اصل وجوہات جاننے کے لیے مزید تحقیقات جاری ہیں۔
