ایک نئی طبی تحقیق میں یہ بات سامنے آئی ہے کہ روزانہ ملٹی وٹامنز کا استعمال بڑھاپے کی رفتار کو سست کرنے میں مدد دے سکتا ہے اور حیاتیاتی عمر کے بڑھنے کے عمل کو کم کر سکتا ہے۔
امریکا میں ماس جنرل بریگھم ہاسپٹل کی جانب سے کی جانے والی تحقیق میں بتایا گیا ہے کہ مسلسل دو سال تک ملٹی وٹامنز استعمال کرنے سے جسم کی حیاتیاتی عمر میں اضافے کی رفتار کم ہو جاتی ہے۔
ماہرین کے مطابق عام طور پر عمر کا تعین تاریخ پیدائش یعنی کرانیکل ایج سے کیا جاتا ہے، تاہم طبی نقطہ نظر سے ایک حیاتیاتی عمر بھی ہوتی ہے جو جسمانی اور ذہنی افعال کی حالت کے مطابق متعین کی جاتی ہے۔
تحقیق کے مطابق جینز، طرز زندگی اور دیگر عوامل حیاتیاتی عمر پر اثر انداز ہوتے ہیں اور اگر حیاتیاتی عمر زیادہ ہو تو مختلف بیماریوں کے خطرات بھی بڑھ سکتے ہیں۔
اس تحقیق میں 958 صحت مند افراد کو شامل کیا گیا جن کی اوسط عمر تقریباً 70 سال تھی۔ تحقیق کے دوران ان افراد کو چار گروپس میں تقسیم کیا گیا اور انہیں مختلف سپلیمنٹس استعمال کرنے کے لیے دیے گئے۔
ایک گروپ کو کوکا ایکسٹریکٹ اور ملٹی وٹامنز دیے گئے، دوسرے گروپ کو کوکا ایکسٹریکٹ کے ساتھ ملٹی وٹامن پلیسبو فراہم کیا گیا، تیسرے گروپ کو کوکا ایکسٹریکٹ پلیسبو کے ساتھ ملٹی وٹامن دیے گئے جبکہ چوتھے گروپ کو دونوں سپلیمنٹس کی جگہ پلیسبو دیے گئے۔
تحقیق کے آغاز میں شرکا کے خون کے نمونے حاصل کیے گئے اور پھر ایک سال اور دو سال بعد دوبارہ نمونے لے کر ان کا تجزیہ کیا گیا۔
نتائج سے معلوم ہوا کہ ملٹی وٹامنز استعمال کرنے والے افراد میں حیاتیاتی عمر میں اضافے کی رفتار کم رہی اور مجموعی طور پر دو سال کے عرصے میں حیاتیاتی عمر میں تقریباً چار ماہ تک کمی دیکھی گئی۔
محققین کے مطابق یہ مثبت اثر خاص طور پر ان افراد میں زیادہ واضح تھا جن میں حیاتیاتی عمر تیزی سے بڑھ رہی تھی۔
ماہرین نے یہ بھی کہا کہ ان نتائج کی مکمل تصدیق کے لیے مزید تحقیق کی ضرورت ہے، تاہم دستیاب شواہد کے مطابق ملٹی وٹامنز کے استعمال سے کسی واضح نقصان کا خطرہ سامنے نہیں آیا۔
