عثمان شنواری اور فہیم اشرف کا آسٹریلوی بگ بیش لیگ کی ٹیم میلبورن رینیگیڈز سے معاہدہ ہوگیا۔
عثمان شنواری نے گذشتہ سیزن میں بھی میلبورن رینیگیڈز کی نمائندگی کرتے ہوئے اچھی کارکردگی کا مظاہرہ کیا تھا، پیسر کا چند روز قبل ہی پی ایس ایل کی فرنچائز کراچی کنگز سے لاہور قلندرز میں تبادلہ ہوا ہے، وہ بگ بیش لیگ میں ابتدائی5 میچز کیلیے دستیاب ہوں گے، جس کے بعد انگلش کرکٹر ہیری گیرنی کو اسکواڈ میں شامل کیا جائے گا۔
عثمان شنواری کو اگر سری لنکا کیخلاف 11 سے 23 دسمبر تک شیڈول ٹیسٹ سیریز کیلیے پاکستانی اسکواڈ میں شامل کرلیا گیا تو بگ بیش سے دستبردار ہونا پڑے گا، پہلی بار کنٹریکٹ پانے والے فہیم اشرف میلبورن رینیگیڈز کو ابتدائی 8 میچز کیلیے دستیاب ہوں گے، جس کے بعد ان کی جگہ افغانستان کے محمد نبی سکواڈ میں شامل ہوجائیں گے، گھٹنے کی انجری کا شکار آل رائونڈر ان دنوں نیشنل کرکٹ اکیڈمی لاہور میں بحالی پروگرام جاری رکھے ہوئے اور تیزی سے صحتیاب ہورہے ہیں۔
