پنجاب حکومت نے بسنت فیسٹیول کے موقع پر لاہور میں عوام اور سیاحوں کے لیے مفت سفری سہولیات فراہم کرنے کا اعلان کر دیا ہے، جس کے تحت مختلف پبلک ٹرانسپورٹ سروسز بلا معاوضہ دستیاب ہوں گی۔ حکام کے مطابق اس اقدام کا بنیادی مقصد بسنت کے دوران شہریوں کو محفوظ، آسان اور مفت سفر کی سہولت دینا اور شہر میں بڑھتے ہوئے ٹریفک کے دباؤ کو کم کرنا ہے۔
انتظامیہ نے شہریوں کو ہدایت کی ہے کہ وہ موٹرسائیکل کے استعمال سے گریز کریں اور پبلک ٹرانسپورٹ کو ترجیح دیں، کیونکہ بسنت کے دوران پتنگ کے دھاگوں کے باعث موٹرسائیکل سواروں کو حادثات کا خطرہ زیادہ رہتا ہے۔ حکام کا کہنا ہے کہ عوام کے تحفظ کو یقینی بنانے کے لیے یہ فیصلہ کیا گیا ہے۔
انتظامیہ کے مطابق بسنت کے تینوں دن لاہور میں اورنج لائن میٹرو ٹرین مکمل طور پر مفت ہو گی، جس سے روزانہ تقریباً دو لاکھ پچاس ہزار مسافروں کو سفری سہولت فراہم کی جائے گی۔ اسی طرح شاہدرہ سے گجومتہ تک چلنے والی میٹرو بس سروس بھی بلا معاوضہ دستیاب ہو گی۔ اس کے علاوہ اسپیڈو اور الیکٹرک بسیں شہر کے 24 مختلف روٹس پر چلائی جائیں گی، جن میں 200 سے زائد فیڈر بسیں شامل ہوں گی تاکہ مختلف علاقوں تک آسان رسائی ممکن بنائی جا سکے۔
پنجاب حکومت نے پہلی مرتبہ نجی رائیڈ ہیلنگ کمپنیوں کے ساتھ شراکت داری بھی کی ہے، جس کے تحت شہریوں کو 60 ہزار مفت کیب رائیڈز اور 6 ہزار مفت رکشہ سفر فراہم کیے جائیں گے۔ پنجاب ماس ٹرانزٹ اتھارٹی کے مطابق بسنت فیسٹیول کے دوران شہر کے اہم علاقوں کو لبرٹی چوک اور دیگر تقریباتی مقامات سے منسلک کرنے کے لیے 24 مرکزی روٹس مقرر کیے گئے ہیں، تاکہ شہریوں اور سیاحوں کو بغیر کسی مشکل کے تقریبات تک پہنچایا جا سکے۔
