لاہور : لاہور ہائی کورٹ نے آئی جی پنجاب کو صحافی عمران ریاض کی بازیابی کیلئے کل سوا 12 بجے تک کی مہلت دے دی۔
لاہور ہائی کورٹ میں صحافی عمران ریاض کی بازیابی سے متعلق درخواست کی سماعت ہوئی۔
چیف جسٹس ہائیکورٹ کی عدالت میں ڈی پی اوسیالکوٹ پیش ہوئے ، وکیل نے استدعا کی کہ آپ عمران ریاض کو پیش کرنے کا حکم دیں۔
عمران ریاض کے وکلانے سیکریٹری دفاع کو طلب کرنے کی استدعا کی ، جس پر لاہور ہائی کورٹ نے ایک گھنٹے میں آئی جی پنجاب اور سیکریٹری داخلہ کو طلب کرلیا۔
عدالتی حکم پر آئی جی پنجاب لاہور ہائی کورٹ میں پیش ہوئے ، عدالت نے آئی جی پنجاب کو عمران ریاض کی بازیابی کیلئےکل سوا 12بجے تک کاوقت دے دیا۔
عدالت نے آئی جی پنجاب کو تمام متعلقہ اداروں سے معاونت لینے اور عمران ریاض کی فیملی کو تحفظ فراہم کرنے کا حکم دے دیا۔
آئی جی پنجاب نے عمران ریاض کی بازیابی کےلئے عدالت کو یقین دہانی کرائی ، جس پر عدالت نے کہا کہ عمران ریاض جہاں بھی ہیں آپ کو انچارج بنایا ہے پیش کریں۔
اظہرصدیق ایڈووکیٹ کےپیش ہونے پر سرکاری وکیل نے اعتراض اٹھایا تاہم چیف جسٹس نے سرکاری وکیل کا اعتراض مسترد کردیا۔
اظہر صدیق ایڈووکیٹ نے کہا کہ موبائل پاس ہونے کے باوجود عمران ریاض کی مددنہیں کی گئی ، پولیس اپنی ڈیوٹی سرانجام دے رہی ہے احسان نہیں کررہی۔
