پاکستان کرکٹ بورڈ (پی سی بی) نے فخر زمان کی فٹنس مسائل کے پیش نظر سابق کپتان بابراعظم کو دوبارہ ٹی20 اسکواڈ میں شامل کرنے پر سنجیدگی سے غور شروع کر دیا ہے۔
ذرائع کے مطابق بابر اعظم کی واپسی کا امکان آئندہ سہ فریقی سیریز اور ایشیا کپ 2025 کے لیے ہے۔ فخر زمان کو ویسٹ انڈیز کے خلاف ٹی20 سیریز میں انجری کا سامنا کرنا پڑا تھا، جس کے باعث وہ نہ صرف ٹی20 بلکہ ون ڈے سیریز سے بھی باہر ہو گئے ہیں۔
پی سی بی نے فخر زمان کو فوری طور پر نیشنل کرکٹ اکیڈمی لاہور میں رپورٹ کرنے کی ہدایت کی ہے جہاں وہ ری ہیب کے مرحلے سے گزریں گے۔ ان کی ایشیا کپ میں شرکت اب غیر یقینی ہو چکی ہے، جبکہ بورڈ ان کی انجری کی نوعیت اور بحالی پر مسلسل نظر رکھے ہوئے ہے۔ اس کے ساتھ ہی متبادل کھلاڑیوں کی تیاری بھی جاری ہے۔
ذرائع کا کہنا ہے کہ اگر فخر زمان مکمل طور پر فٹ نہ ہو سکے تو بابر اعظم کو اسکواڈ میں شامل کیا جا سکتا ہے۔ تاہم ان کی واپسی کا انحصار ویسٹ انڈیز کے خلاف ون ڈے سیریز میں ان کی کارکردگی پر ہوگا۔ اگر وہ سلیکٹرز کو متاثر کرنے میں کامیاب ہو گئے تو ان کے ٹیم میں شامل ہونے کے امکانات بڑھ جائیں گے۔
حال ہی میں بابر اعظم نے محمد رضوان اور نسیم شاہ کے ہمراہ چیئرمین پی سی بی محسن نقوی سے ویسٹ انڈیز کے خلاف دوسرے ٹی20 میچ کے دوران ملاقات بھی کی تھی۔
ایشیا کپ کے لیے حتمی اسکواڈ کا اعلان اگست کے دوسرے ہفتے میں متوقع ہے۔ ایونٹ کا آغاز 9 ستمبر کو گروپ بی کے مقابلے میں افغانستان اور ہانگ کانگ کے درمیان میچ سے ہوگا۔
ٹورنامنٹ میں آٹھ ٹیمیں حصہ لیں گی، جنہیں دو گروپس میں تقسیم کیا گیا ہے۔ گروپ اے میں پاکستان، بھارت، یو اے ای اور عمان شامل ہیں، جب کہ گروپ بی میں بنگلہ دیش، افغانستان، سری لنکا اور ہانگ کانگ شامل ہیں۔
پاکستان اپنا پہلا میچ 12 ستمبر کو عمان کے خلاف کھیلے گا، دوسرا میچ روایتی حریف بھارت کے خلاف 14 ستمبر کو ہوگا، جبکہ گروپ مرحلے کا آخری میچ 17 ستمبر کو یو اے ای کے خلاف ہوگا۔
