لاہور کی انسداد دہشت گردی عدالت نے پاکستان تحریک انصاف کے سینئر رہنما اور سابق وزیر خارجہ شاہ محمود قریشی کو رہا کرنے کا حکم جاری کر دیا ہے۔ عدالت نے یہ حکم 9 مئی کے واقعات سے متعلق دو مقدمات میں دیا، جن میں شاہ محمود قریشی کو بری قرار دیا گیا۔
انسداد دہشت گردی عدالت لاہور کے جج منظر علی گل نے سپرنٹنڈنٹ جیل کو مراسلہ جاری کیا، جس میں ہدایت کی گئی کہ اگر شاہ محمود قریشی کسی اور مقدمے میں مطلوب نہیں ہیں تو انہیں فوری طور پر رہا کر دیا جائے۔
گزشتہ روز، انسداد دہشت گردی عدالت نے کوٹ لکھپت جیل میں تھانہ شادمان جلاؤ گھیراؤ اور جناح ہاؤس کے قریب گاڑیاں جلانے کے مقدمات کا فیصلہ سنایا تھا۔ اس فیصلے میں شاہ محمود قریشی کو 9 مئی کے مزید دو مقدمات میں بری کر دیا گیا، جبکہ پی ٹی آئی کی دیگر رہنماؤں میں سے ڈاکٹر یاسمین راشد، محمود الرشید اور اعجاز چوہدری کو 10، 10 سال قید کی سزا سنائی گئی۔
یاد رہے کہ القادر ٹرسٹ کیس میں عمران خان کی اسلام آباد ہائی کورٹ سے گرفتاری کے بعد ملک بھر میں پی ٹی آئی کارکنوں کی جانب سے شدید احتجاج کیا گیا تھا۔ لاہور میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نقصان پہنچایا گیا۔
اسی دوران مظاہرین نے کور کمانڈر لاہور کی رہائش گاہ پر دھاوا بولا اور راولپنڈی میں جی ایچ کیو کا ایک گیٹ بھی توڑ دیا تھا۔ ان واقعات کے بعد قانون نافذ کرنے والے اداروں نے لڑائی، توڑ پھوڑ اور جلاؤ گھیراؤ میں ملوث 1900 سے زائد افراد کو گرفتار کیا۔
