چین کے شہر ووہان میں ووچانگ شپ بلڈنگ انڈسٹری گروپ کمپنی لمیٹڈ کے شوانگلیو بیس پر پاک بحریہ کی تیسری ہنگور کلاس آبدوز پی این ایس ایم مانگرو (MANGRO) کی شاندار لانچنگ تقریب منعقد کی گئی۔ اس موقع پر ڈپٹی چیف آف نیول اسٹاف (پراجیکٹ-2) وائس ایڈمرل عبدالصمد مہمان خصوصی تھے، جنہوں نے آبدوز کی لانچنگ کے موقع پر خصوصی خطاب بھی کیا۔
تقریب سے خطاب کرتے ہوئے وائس ایڈمرل عبدالصمد نے موجودہ خطے کے جیو اسٹریٹجک حالات کا ذکر کرتے ہوئے میری ٹائم سیکیورٹی کی اہمیت کو اجاگر کیا۔ انہوں نے واضح کیا کہ پاک بحریہ نہ صرف قومی مفادات کے تحفظ کے لیے پرعزم ہے بلکہ ایک محفوظ، پرامن اور مشترکہ سمندری ماحول کے قیام کے لیے بھی اپنا بھرپور کردار ادا کرتی رہے گی۔
وائس ایڈمرل نے ہنگور کلاس آبدوزوں کے حوالے سے کہا کہ جدید ہتھیاروں اور جدید ترین سینسرز سے لیس یہ آبدوزیں نہ صرف پاک بحریہ کی آپریشنل صلاحیتوں میں اضافہ کریں گی بلکہ خطے میں امن، استحکام اور طاقت کے توازن کو بھی یقینی بنانے میں کلیدی کردار ادا کریں گی۔
اس موقع پر انہوں نے چائنا شپ بلڈنگ اینڈ آف شور انٹرنیشنل کمپنی لمیٹڈ (CSOC) کی انتھک کاوشوں کو سراہتے ہوئے کہا کہ منصوبے کی کامیاب پیش رفت اس بات کی عکاس ہے کہ پاک چین دفاعی تعاون مزید مستحکم ہو رہا ہے۔ انہوں نے اس اعتماد کا اظہار کیا کہ ہنگور کلاس آبدوزوں کا منصوبہ پاک چین اسٹریٹجک شراکت داری کو ایک نئی جہت فراہم کرے گا۔
یاد رہے کہ حکومت پاکستان نے سی ایس او سی کے ساتھ 8 ہنگور کلاس آبدوزوں کے حصول کا معاہدہ کیا تھا، جن میں سے چار چین میں تیار کی جا رہی ہیں جبکہ دیگر چار آبدوزیں ٹیکنالوجی کی منتقلی (ToT) کے تحت کراچی شپ یارڈ اینڈ انجینئرنگ ورکس لمیٹڈ میں تیار ہوں گی۔
لانچنگ تقریب میں پاکستان اور چین کے اعلیٰ حکام نے بھی شرکت کی، جن میں ووچانگ شپ بلڈنگ انڈسٹری گروپ کمپنی لمیٹڈ اور چائنا شپ بلڈنگ اینڈ آف شور انٹرنیشنل کمپنی لمیٹڈ کے نمائندے شامل تھے۔
