فیلڈ مارشل اور چیف آف آرمی اسٹاف جنرل سید عاصم منیر نے بلوچستان کے علاقے تربت کا دورہ کیا، جہاں انہوں نے سیکیورٹی کی مجموعی صورتحال، جاری ترقیاتی منصوبوں اور عوامی فلاح کے اقدامات کا تفصیلی جائزہ لیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف کو اس موقع پر خطے کی سیکیورٹی ڈائنامکس پر بریفنگ دی گئی، جبکہ انہیں “فتنہ الہندوستان” کے خلاف کامیاب آپریشنز کی تفصیلات سے بھی آگاہ کیا گیا۔ اس کے علاوہ آرمی چیف کو سماجی و معاشی ترقی کے لیے کیے جانے والے اقدامات پر بھی بریفنگ دی گئی۔
وزیر اعلیٰ بلوچستان میر سرفراز بگٹی، چیف سیکریٹری اور دیگر اعلیٰ حکام بھی اس دورے میں آرمی چیف کے ہمراہ موجود تھے۔ سول انتظامیہ کے ساتھ ملاقات کے دوران جنرل عاصم منیر نے بہتر طرزِ حکمرانی اور عوامی شمولیت کی اہمیت پر زور دیا اور اس بات کو اجاگر کیا کہ ترقی کے لیے سول و ملٹری اشتراک ناگزیر ہے۔
آرمی چیف نے اپنے خطاب میں فوجی جوانوں کے بلند حوصلے اور آپریشنل تیاریوں کو سراہتے ہوئے کہا کہ امن و استحکام کے قیام میں ان کا کردار کلیدی حیثیت رکھتا ہے۔ اس موقع پر انہوں نے بلوچستان کے عوام کی خوشحالی اور پائیدار ترقی کے لیے پاک فوج کے عزم کو ایک بار پھر دوہرایا۔
دورے کے آغاز پر تربت آمد پر کور کمانڈر بلوچستان نے آرمی چیف کا پرتپاک استقبال کیا۔
