کراچی کے مصروف علاقے شارع فیصل ڈرگ روڈ انڈر بائی پاس پر ایک افسوسناک ٹریفک حادثہ پیش آیا، جہاں ڈی 11 روٹ کی تیز رفتار مسافر مزدا نے دو موٹر سائیکلوں کو ٹکر مار دی۔ حادثے کے نتیجے میں ایک خاتون سمیت تین افراد موقع پر ہی جاں بحق ہوگئے جبکہ ایک خاتون شدید زخمی ہو گئی۔
حادثے کی اطلاع ملنے پر پولیس اور ٹریفک پولیس فوری طور پر جائے وقوعہ پر پہنچ گئی اور جاں بحق و زخمی افراد کو ایدھی ایمبولینس کے ذریعے جناح اسپتال منتقل کیا گیا۔ پولیس نے مسافر مزدا کو تحویل میں لے لیا جبکہ ڈرائیور کو گرفتار کر کے متعلقہ تھانے منتقل کردیا۔
ایس ایچ او شارع فیصل افتخار احمد آرائیں نے بتایا کہ جاں بحق افراد میں 60 سالہ سیما، ان کا بیٹا 24 سالہ محمد شعیب اور 42 سالہ حارث شامل ہیں جبکہ زخمی خاتون کی شناخت 24 سالہ نائلہ زوجہ شعیب کے نام سے ہوئی ہے۔ ابتدائی معلومات کے مطابق محمد شعیب اپنی والدہ اور اہلیہ کے ساتھ موٹر سائیکل پر سوار تھا جبکہ دوسری موٹر سائیکل پر متوفی حارث موجود تھا۔ محمد شعیب پاکستان نیوی میں ملازم اور شاہ لطیف ٹاؤن کا رہائشی تھا، جبکہ حارث کا تعلق لیاری آگرہ تاج کالونی سے تھا۔
ایس ایچ او کے مطابق ابتدائی تحقیقات میں پتہ چلا کہ مسافر مزدا کے بریک فیل ہونے کے باعث ڈرائیور نے رفتار کم کرنے کے لیے گیئر تبدیل کرنے کی کوشش کی لیکن ناکامی کے بعد حادثہ رونما ہوا۔ ڈرائیور نے دورانِ تفتیش اعتراف کیا کہ اس نے پوری کوشش کی مگر بروقت قابو نہ پاسکا۔
دوسری جانب شارع فیصل ٹریفک سیکشن کے انچارج ایس او عزیز نے دعویٰ کیا کہ انڈر بائی پاس میں برساتی پانی اور کیچڑ جمع تھا، جس کی وجہ سے موٹر سائیکلیں پھسل گئیں اور پیچھے سے آنے والی تیز رفتار مسافر مزدا ان پر چڑھ گئی۔ انہوں نے مزید کہا کہ متعلقہ اداروں کو اس صورتحال سے آگاہ کردیا گیا ہے اور پانی و کیچڑ نکالنے کے لیے اقدامات شروع کر دیے گئے ہیں۔
اسی دوران قیوم آباد چورنگی کے قریب ایک اور حادثہ ہوا جہاں واٹر ٹینکر نے ایک موٹر سائیکل کو ٹکر مار دی۔ حادثے میں 25 سالہ نوجوان محمد عثمان ولد عبدالرشید شدید زخمی ہوگیا جسے فوری طور پر چھیپا ایمبولینس کے ذریعے جناح اسپتال منتقل کردیا گیا۔ پولیس نے موقع پر پہنچ کر واٹر ٹینکر اور موٹر سائیکل تحویل میں لے کر تفتیش شروع کر دی ہے۔
