دریائے چناب میں ہیڈ پنجند کے مقام پر پانی کے بہاؤ میں نمایاں اضافہ ریکارڈ کیا گیا ہے جس کے نتیجے میں سندھ کے مختلف بیراجوں میں بھی پانی کی سطح مسلسل بلند ہو رہی ہے۔
محکمہ اطلاعات سندھ نے تازہ ترین اعداد و شمار جاری کرتے ہوئے بتایا کہ پنجند پر اس وقت پانی کی آمد و اخراج 6 لاکھ 68 ہزار 195 کیوسک تک پہنچ چکا ہے، جبکہ تریموں پر آمد و اخراج ایک لاکھ 78 ہزار 932 کیوسک ریکارڈ کی گئی ہے۔
وزارت آبی وسائل کے مطابق دریائے سندھ پر گڈو بیراج میں پانی کی آمد 5 لاکھ 2 ہزار 861 کیوسک جبکہ اخراج 4 لاکھ 75 ہزار 970 کیوسک ہے۔ سکھر بیراج پر آمد 4 لاکھ 40 ہزار 985 اور اخراج 4 لاکھ 12 ہزار 735 کیوسک ریکارڈ کیا گیا، جبکہ کوٹری بیراج میں آمد 2 لاکھ 57 ہزار 754 اور اخراج 2 لاکھ 54 ہزار 354 کیوسک ہے۔
مزید اعداد و شمار کے مطابق تربیلا ڈیم 27 اگست سے 100 فیصد بھر چکا ہے اور اس وقت اس کا لیول 1550 فٹ پر برقرار ہے۔ منگلا ڈیم بھی 92 فیصد سے زیادہ بھرا ہوا ہے جس کا موجودہ لیول 1234.60 فٹ ریکارڈ کیا گیا ہے۔
وفاقی فلڈ کمیشن نے آئندہ 12 گھنٹوں میں گڈو بیراج میں اونچے درجے کے سیلاب، سکھر بیراج پر درمیانے درجے کے سیلاب اور کوٹری بیراج پر نچلے درجے کے سیلاب کی پیشگوئی کی ہے۔
دریائے راوی میں سدھنائی کے مقام پر اونچے درجے کا سیلاب ہے، جبکہ دریائے چناب کے پنجند بیراج پر غیر معمولی اونچے درجے کا سیلاب جاری ہے۔ اسی طرح دریائے ستلج میں گنڈا سنگھ والا پر بہت اونچے درجے کا سیلاب ہے جبکہ سلیمانکی اور اسلام ہیڈ ورکس پر اونچے درجے کے سیلاب کی صورتحال ہے۔
