کراچی کے مختلف علاقوں میں صبح سویرے ہلکی بارش کے باعث موسم خوشگوار ہوگیا۔ آئی آئی چندریگر روڈ، صدر اور گارڈن سمیت کئی مقامات پر رم جھم کے بعد شہریوں نے نسبتاً خنکی کا احساس کیا۔
دوسری جانب محکمہ موسمیات نے پیش گوئی کی ہے کہ آج سے 19 ستمبر تک ملک کے بالائی حصوں میں وقفے وقفے سے بارش کا سلسلہ جاری رہنے کا امکان ہے۔ محکمہ کے مطابق خیبرپختونخوا، کشمیر، گلگت بلتستان، اسلام آباد اور پنجاب کے مختلف علاقوں میں بعض مقامات پر موسلادھار بارش بھی ہو سکتی ہے۔
سندھ کے بیشتر اضلاع میں موسم خشک رہنے کی توقع ہے، البتہ ساحلی علاقوں میں مطلع جزوی طور پر ابر آلود رہے گا۔ بلوچستان کے بیشتر حصوں میں بھی بادل چھائے رہنے کا امکان ظاہر کیا گیا ہے۔
ادھر صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں ممکنہ خطرے کے پیش نظر الرٹ جاری کیا ہے۔ اتھارٹی نے خبردار کیا ہے کہ بارشوں کے باعث گلیشیائی جھیلوں کے پھٹنے کا خدشہ موجود ہے، جس کے لیے انتظامیہ کو احتیاطی اقدامات کی ہدایت دی گئی ہے۔
