پاکستان علماء کونسل نے آج ملک بھر میں یوم تشکرو یوم دعا منانے کا اعلان کیا ہے۔
پاکستان علماء کونسل کے مرکزی چیئر مین حافظ محمد طاہر محمود اشرفی، علامہ عبدالحق مجاہد، مولانا نعمان حاشر اور دیگر قائدین نے کہا ہے پاکستان اور سعودی عرب کے درمیان دفاعی اسٹریٹیجک معاہدے پر آج یوم تشکرو یوم دعا منایا جائے گا۔
اللہ تبارک و تعالیٰ نے دونوں ملکوں کی قیادت کی سوچ وفکر کے نتیجے میں اس معاہدے کی تکمیل تک پہنچایا اور آج پاکستان کو اللہ تبارک و تعالیٰ کے فضل و احسان سے مسلمانوں کے مقدس مقامات کی حفاظت کی جو ذمہ داری ملی ہے اس پر اللہ تعالی کا شکر ادا کرنا اور اس ذمہ داری کو بخوبی سرانجام دینے کیلئے دعا کرنا ہم سب پر لازم ہے ارض حرمین شریفین کی حفاظت کی سعادت تمام پاکستان کیلئے فخر کا سبب ہے اور یہ وہ مقدس ترین زمین ہے جس پر ہمارے آقاؐ کی پیدائش ہوئی اور ہمارے آقاؐ کی مسجد اور روضہ اطہر اور بیت اللہ شریف ہے۔
پاکستان کے وزیراعظم میاں محمد شہباز شریف کی قیادت اور فیلڈ مارشل جنرل سید حافظ عاصم منیر کی کامیاب عسکری مہارت اور پیشہ وارانہ بصیرت کی وجہ سے پاکستان کو یہ مقام حاصل ہوا ہے اس پر ہم اللہ تعالیٰ کا شکر ادا کرتے ہیں۔ علماء و مشائخ، آئمہ و خطباء جمعۃ المبارک کو یوم تشکر ویوم دعا منائیں گے۔
