بھارت میں سابق ہائی کمشنر عبدالباسط کا کہنا ہے کہ پاکستان اور سعودی عرب کے درمیان دفاعی معاہدے نے نئی دہلی کو پریشان کر دیا ہے۔
سابق سفیر عبدالباسط نے کہا کہ پاکستان اور سعودی عرب کے دیرینہ تعلقات ہیں، پاک سعودیہ دفاعی معاہدہ بہت اہمیت کا حامل ہے۔
عبدالباسط نے کہا کہ اسرائیل کے قطر پر حملے نے عرب دنیا کو ہلا کر رکھ دیا ہے۔
گزشتہ روز بھارت نے پاکستان اور سعودی عرب کے درمیان ہونے والے انتہائی اہمیت کے حامل دفاعی معاہدے پر محتاط ردعمل کا اظہار کیا تھا۔
بھارتی وزارت خارجہ کے ترجمان رندھیر جیسوال نے میڈیا کے سوالات کا جواب دیتے ہوئے کہا تھا کہ ہم نے پاکستان اور سعودی عرب کے درمیان اسٹریٹجک باہمی دفاعی معاہدے پر دستخط کی اطلاعات سنی ہیں، بھارتی حکومت کو اس بات کا علم ہے اور وہ اس پیشرفت کو غور سے دیکھ رہی ہے۔
انہوں نے کہا تھا کہ بھارتی حکومت ملکی قومی مفادات کے تحفظ اور تمام شعبوں میں جامع قومی سلامتی کو یقینی بنانے کیلیے پُرعزم ہے۔
پاکستان اور سعودی عرب میں بڑا دفاعی معاہدہ طے پایا ہے جس پر وزیر اعظم شہباز شریف اور سعودی ولی عہد محمد بن سلمان نے دستخط کیے۔
معاہدہ دونوں ممالک کی سلامتی کو بڑھانے کیلیے مشترکہ عزم کی عکاسی ہے، خطے اور دنیا میں سلامتی و امن کے حصول کیلیے مشترکہ عزم ہے۔
اعلامیہ میں کہا گیا کہ معاہدے کا مقصد کسی بھی جارحیت کیخلاف مشترکہ دفاع و تحفظ مضبوط بنانا ہے کسی ملک کے خلاف جارحیت دونوں ممالک کے خلاف جارحیت تصور ہوگی۔
وزیر اعظم شہباز شریف اور سعودی ولی عہد محمد بن سلمان کی اہم ملاقات ہوئی جس میں فیلڈ مارشل عاصم منیر، نائب وزیر اعظم اسحاق ڈار ودیگر وزرا بھی شریک تھے۔
ملاقات میں دو طرفہ تعلقات اور دفاعی تعاون پر گفتگو کی گئی۔ سعودی ولی عہد محمد بن سلمان نے پاکستان کو بھرپور تعاون کی یقین دہانی کروائی۔
