سوئی ناردرن گیس پائپ لائنز لمیٹڈ (ایس این جی پی ایل) نے گھریلو صارفین کے لیے نئے کنکشن فراہم کرنے کے عمل کا آغاز کر دیا ہے اور اس سلسلے میں درخواستوں کی وصولی شروع ہو گئی ہے۔ کمپنی کی جانب سے جاری اعلامیے کے مطابق ان درخواست دہندگان کو ترجیح دی جائے گی جنہوں نے گیس کنکشنز پر عائد پابندی سے پہلے ہی ڈیمانڈ نوٹس یا فوری فیس جمع کرا دی تھی۔
ایس این جی پی ایل کے مطابق نئے کنکشن کے خواہشمند صارفین درآمدی آر ایل این جی پر مبنی معاہدے پر دستخط کرنے کے بعد، سیکیورٹی کے فرق کی ادائیگی کے ذریعے کنکشن حاصل کر سکیں گے۔ مزید بتایا گیا کہ ایسے افراد جنہوں نے پہلے ہی سسٹم گیس کے لیے درخواست جمع کرائی تھی، انہیں یہ سہولت حاصل ہوگی کہ وہ چاہیں تو نئی آر ایل این جی پر مبنی درخواست عام یا فاسٹ ٹریک میرٹ کے تحت جمع کروا سکتے ہیں۔
کمپنی نے تفصیلات جاری کرتے ہوئے کہا ہے کہ فاسٹ ٹریک درخواست کی فیس 25 ہزار روپے مقرر کی گئی ہے، جبکہ آر ایل این جی پر مبنی نئے کنکشن کے لیے سیکیورٹی چارجز (قابل واپسی) 20 ہزار روپے ہوں گے۔ دس مرلہ تک کے گھروں کے لیے سروس لائن کی لاگت 1500 روپے جبکہ دس مرلہ سے بڑے گھروں کے لیے 3000 روپے رکھی گئی ہے۔ تاہم درخواست جمع کروانے پر کوئی اضافی فیس عائد نہیں کی گئی۔
اعلامیے میں مزید بتایا گیا کہ آر ایل این جی پر مبنی گھریلو کنکشن کا ٹیرف روایتی گھریلو گیس کے نرخوں کے مقابلے میں تقریباً 70 فیصد زیادہ ہوگا، جس کا مطلب ہے کہ نئے کنکشن رکھنے والے صارفین کو روایتی صارفین کی نسبت زیادہ قیمت ادا کرنا ہوگی۔ یہ اقدام نہ صرف کمپنی کے ریونیو میں اضافہ کرے گا بلکہ صارفین کے لیے انتخاب کا نیا موقع بھی فراہم کرے گا۔
