اسلام آباد: ہائی کورٹ نے لاپتا افراد سے متعلق مقدمات میں ان کیمرا بریفنگ طلب کرلی ہے۔ یہ ہدایت جسٹس محسن اختر کیانی نے عمر عبداللہ بازیابی کیس کی سماعت کے دوران جاری تحریری حکم نامے میں دی۔
عدالتی حکم نامے کے مطابق وفاقی حکومت کو پہلے ہی ہدایت دی گئی تھی کہ جبری گمشدگیوں کے متاثرہ خاندانوں کے لیے معاوضے کی پالیسی مرتب کی جائے۔ اس حوالے سے وزارتِ داخلہ نے عمل درآمد کے لیے ایک خصوصی کمیٹی قائم کردی ہے۔
عدالت کو بتایا گیا کہ درخواست گزار زینب زعیم کو معاوضے کی رقم ان کے بینک اکاؤنٹ میں منتقل کردی گئی ہے۔ عدالت نے مزید ہدایت دی کہ درخواست گزار آئندہ سماعت پر رقم کی وصولی کی تصدیق پیش کریں۔
اسلام آباد ہائی کورٹ نے بعد ازاں کیس کی مزید سماعت 6 اکتوبر کے لیے مقرر کردی۔
