کراچی: قومی ایئر لائن کے ایئرکرافٹ انجینئرز کی جاری ہڑتال کے باعث آج بھی مزید 14 پروازیں منسوخ کردی گئی ہیں، جس کے نتیجے میں فضائی آپریشن مسلسل مشکلات کا شکار ہے۔
نیوز رپورٹ کے مطابق، ایئرکرافٹ انجینئرز کی ہڑتال آج چوتھے روز میں داخل ہوچکی ہے، اور اس دوران آج کی 14 منسوخ شدہ پروازوں سمیت مجموعی طور پر 39 پروازیں آپریشن سے خارج کی جاچکی ہیں، جس سے مسافروں کی بڑی تعداد شدید پریشانی کا سامنا کررہی ہے۔
حکام نے بتایا کہ صرف پروازوں کی منسوخی ہی نہیں بلکہ قومی ایئر لائن کی متعدد پروازوں میں تاخیر کا دورانیہ بھی بڑھ کر 13 گھنٹے تک پہنچ گیا ہے، جس کے باعث سفر کرنے والے افراد کو اضافی مشکلات پیش آرہی ہیں۔
رپورٹ کے مطابق، کراچی، ملتان، اسلام آباد، پشاور، فیصل آباد اور لاہور سے روانہ ہونے والی کئی پروازیں ہڑتال کے باعث منسوخ کی جاچکی ہیں، اور مزید منسوخیوں کا امکان بھی ظاہر کیا جارہا ہے۔
واضح رہے کہ قومی ایئر لائن کے ایئرکرافٹ انجینئرز تنخواہوں میں اضافہ نہ ہونے پر احتجاج جاری رکھے ہوئے ہیں، جبکہ گزشتہ روز سوسائٹی آف ایئرکرافٹ کے صدر اور سیکرٹری کو ملازمت سے برطرف بھی کردیا گیا تھا، جس کے بعد صورتحال مزید کشیدہ ہوگئی ہے۔
