وفاقی وزیرِ داخلہ محسن نقوی نے کہا ہے کہ چین پاکستان کا ایک بااعتماد اور دیرینہ دوست ہے جس نے ہر مشکل اور نازک مرحلے پر پاکستان کا ساتھ نبھایا ہے، دونوں ممالک کے تعلقات باہمی اعتماد اور باہمی احترام کی مضبوط بنیادوں پر قائم ہیں۔
وفاقی وزیرِ داخلہ محسن نقوی اور چین کے سفیر جیان زیڈونگ کے درمیان ملاقات ہوئی، جس میں پاک چین دوطرفہ تعلقات اور مشترکہ دلچسپی کے متعدد امور پر تفصیلی تبادلۂ خیال کیا گیا۔
ملاقات کے دوران دونوں ممالک کے درمیان انسدادِ دہشت گردی اور سیکیورٹی تعاون کو مزید مستحکم بنانے پر اتفاق کیا گیا، تاکہ مشترکہ سلامتی چیلنجز کا زیادہ مؤثر طریقے سے مقابلہ کیا جا سکے۔
چینی سفیر نے ملاقات کے دوران اسلام آباد میں ہونے والے خودکش حملے کی مذمت کی اور قیمتی انسانی جانوں کے ضیاع پر وفاقی وزیرِ داخلہ سے تعزیت کا اظہار بھی کیا۔
محسن نقوی نے کہا کہ پاکستان دہشت گردی سے سب سے زیادہ متاثر ہونے والا ملک ہے اور اس لعنت کے خاتمے کے لیے مسلسل اقدامات جاری ہیں۔
چینی سفیر جیان زیڈونگ کا کہنا تھا کہ چین کی وزارتِ خارجہ کے ترجمان نے بھی اس واقعے کی مذمت کی ہے، اور چین پاکستان کے ساتھ مکمل اور بھرپور تعاون جاری رکھے گا۔
