پاکستان کے معروف ریپر طلحہ انجم اور طلحہ یونس نیپال میں ہونے والے اپنے حالیہ کنسرٹ کے دوران اس وقت سوشل میڈیا پر موضوعِ بحث بن گئے جب کنسرٹ کے اسٹیج پر دونوں نے مختلف ممالک کے پرچم تھام کر حاضرین کی توجہ حاصل کی۔ رپورٹس کے مطابق طلحہ انجم نے خیر سگالی اور دوستی کے اظہار کے طور پر بھارتی پرچم لہرایا، جب کہ اسٹیج پر موجود طلحہ یونس نے نیپالی پرچم اٹھا کر مداحوں کا شکریہ ادا کیا۔
کنسرٹ میں شریک مداحوں کی جانب سے اس واقعے کی ویڈیوز اور تصاویر سوشل میڈیا پر شیئر کی گئیں جن کے مطابق فنکاروں کا یہ اقدام مختلف ممالک سے آئے ہوئے شرکا کے احترام اور امن و دوستی کے پیغام کے طور پر دیکھا گیا۔
پاکستان میں سوشل میڈیا صارفین نے اس عمل پر ملا جلا ردِ عمل دیا۔ کچھ صارفین نے اسے ایک مثبت اور جرات مندانہ اقدام قرار دیا، جب کہ بعض نے اسے غیر ضروری اور غیر محتاط فیصلہ کہا۔
طلحہ یونس کی جانب سے نیپالی پرچم اٹھانے کے باعث مقامی مداحوں نے بھرپور جوش و خروش کا اظہار کرتے ہوئے ان کے نیپال آنے پر شکریہ ادا کیا۔ دونوں فنکاروں کی پرفارمنس کے دوران اسٹیج پر بھرپور جوش و خروش دیکھنے میں آیا اور کنسرٹ کامیابی کے ساتھ اختتام پذیر ہوا۔
واقعے کے بعد پاکستان اور بھارت دونوں جانب سے سوشل میڈیا پر مختلف آراء سامنے آئیں، جبکہ نیپالی مداحوں نے اس عمل کو “ایک خوبصورت پیغام” قرار دیا ہے۔ تاحال دونوں ریپرز کی جانب سے اس حوالے سے کوئی باضابطہ بیان جاری نہیں کیا گیا۔
