کراچی میں ٹریفک قوانین کی خلاف ورزی پر جاری ہونے والے ای چالان حالیہ دنوں میں شہریوں کی بھرپور توجہ کا مرکز بنے ہوئے ہیں، اور بڑی تعداد میں شہری مسلسل شکایات کے ساتھ یہ مطالبہ کر رہے ہیں کہ جرمانوں کی رقم کو کم کیا جائے۔ ان ہی عوامی مطالبات کے پیش نظر پولیس حکام اس معاملے پر سنجیدگی سے غور کر رہے ہیں اور توقع ظاہر کی جا رہی ہے کہ آئندہ دنوں میں اس حوالے سے ایک اہم فیصلہ سامنے آ سکتا ہے۔
ایک اعلیٰ پولیس افسر نے بتایا کہ سندھ بھر میں مختلف نوعیت کی ٹریفک خلاف ورزیوں پر عائد کیے جانے والے ای چالان جرمانوں میں کمی کی تجویز زیرِ غور ہے، اور اس حوالے سے محکمہ پولیس اور سندھ حکومت کے درمیان مشاورت کا عمل جاری ہے۔ امکان ظاہر کیا جاتا ہے کہ آئندہ ہفتے بعض جرمانوں کی رقم میں کمی کا باضابطہ اعلان کیا جا سکتا ہے، جس سے شہریوں کو وقتی ریلیف مل سکتا ہے۔
افسر کے مطابق یہ رعایت مستقل نوعیت کی نہیں ہوگی، بلکہ مخصوص مدت کے لیے چند ٹریفک خلاف ورزیوں پر جرمانوں میں نرمی دی جائے گی، جبکہ انتہائی خطرناک اور شہریوں کی جان و مال کو نقصان پہنچانے والی سنگین خلاف ورزیوں کے خلاف کارروائی مزید سخت کرنے کی تجویز بھی شامل ہے۔
پولیس حکام نے یہ بھی بتایا کہ شہریوں میں ٹریفک قوانین کی اہمیت اجاگر کرنے اور نئی پالیسی سے آگاہ کرنے کے لیے آئندہ ہفتے ایک جامع آگاہی مہم شروع کیے جانے کی تیاریاں کی جا رہی ہیں، جس میں مختلف ذرائع ابلاغ اور ڈیجیٹل پلیٹ فارمز کو استعمال کرنے کی منصوبہ بندی کی جا رہی ہے۔
