پاکستان کرکٹ بورڈ (پی سی بی) نے قومی کرکٹرز کو بیرونِ ملک مختلف کرکٹ لیگز میں شرکت کی اجازت دیتے ہوئے محمد عامر سمیت کئی کھلاڑیوں کو باضابطہ این او سی جاری کر دیے ہیں۔ یہ این او سی ابوظہبی میں ہونے والی ٹی ٹین لیگ اور دبئی میں شیڈول آئی ایل ٹی ٹوئنٹی لیگ کے لیے جاری کیے گئے ہیں۔
نجی ٹی وی کے مطابق ابوظہبی میں ٹی ٹین لیگ کے لیے کھلاڑیوں کو 25 نومبر تک این او سی جاری کیے گئے ہیں، جبکہ دبئی کی ٹی ٹوئنٹی لیگ میں شرکت کرنے والے تین کھلاڑیوں کو 2 دسمبر سے 4 جنوری تک شرکت کی اجازت دی گئی ہے۔
ابوظہبی لیگ کے لیے جن کھلاڑیوں کو این او سی جاری ہوئے ہیں ان میں محمد عامر، اعظم خان، شاہنواز دھانی، افتخار احمد، زمان خان، آصف علی، سلمان ارشاد، عرفات منہاس، عرفان خان، عباس آفریدی، عاکف جاوید، میر حمزہ، عبید شاہ اور خواجہ نافع شامل ہیں۔
دبئی کی ٹی ٹوئنٹی لیگ کے لیے فخر زمان، حسن نواز اور نسیم شاہ کو این او سی جاری کیے گئے ہیں۔ واضح رہے کہ اس سے قبل پاکستان کے بڑے ناموں—شاہین شاہ آفریدی، بابراعظم، محمد رضوان، حسن علی، حارث رؤف اور شاداب خان—کو بگ بیش لیگ میں شرکت کے لیے این او سی پہلے ہی جاری کیے جا چکے ہیں۔
