ملک بھر میں ہونے والے ضمنی انتخابات کے نتائج سامنے آ گئے ہیں، جن میں مسلم لیگ (ن) نے قومی اسمبلی کی 6 اور صوبائی اسمبلی کی 7 نشستوں پر نمایاں کامیابیاں حاصل کیں۔ غیر سرکاری و غیر حتمی نتائج کے مطابق پاکستان تحریک انصاف کی خالی شدہ تقریباً تمام نشستیں مسلم لیگ (ن) نے جیت لیں، جبکہ صوبائی سطح پر پیپلز پارٹی کو صرف ایک نشست پر کامیابی ملی۔

قومی اسمبلی — (NA) حلقوں کے نتائج

NA-129 لاہور

334 پولنگ اسٹیشنز کے غیر حتمی غیر سرکاری نتائج کے مطابق مسلم لیگ (ن) کے حافظ میاں محمد نعمان 63 ہزار 441 ووٹ لے کر واضح برتری کے ساتھ کامیاب رہے۔ پی ٹی آئی کے حمایت یافتہ آزاد امیدوار ارسلان احمد 29 ہزار 99 ووٹ لے کر دوسرے نمبر پر آئے۔
یہ نشست پی ٹی آئی کے میاں اظہر کے انتقال کے بعد خالی ہوئی تھی۔

NA-185 ڈیرہ غازی خان

ڈیرہ غازی خان کے حلقہ 185 میں مسلم لیگ (ن) کے محمود قادر خان 82 ہزار 416 ووٹ حاصل کرکے فاتح رہے، جبکہ پیپلز پارٹی کے دوست محمد کھوسہ 49 ہزار 262 ووٹ لے سکے۔
یہ نشست پی ٹی آئی کی زرتاج گل کی نااہلی کے باعث خالی ہوئی تھی۔

NA-143 ساہیوال

ساہیوال 3 کے حلقے میں مسلم لیگ (ن) کے محمد طفیل جٹ نے بھرپور کامیابی حاصل کی اور ایک لاکھ 36 ہزار 223 ووٹ لیے، جبکہ آزاد امیدوار ضرار اکبر چوہدری 13 ہزار 220 ووٹ پر محدود رہے۔
یہ نشست پی ٹی آئی کے حسن نواز کی نااہلی کے بعد خالی ہوئی تھی۔

NA-104 فیصل آباد

فیصل آباد 10 میں (ن) لیگ کے دانیال احمد نے 52 ہزار 791 ووٹ لے کر کامیابی اپنے نام کی، جب کہ آزاد امیدوار رانا عدنان جاوید 19 ہزار 262 ووٹ حاصل کر سکے۔

NA-96 فیصل آباد

345 پولنگ اسٹیشنز کے مکمل نتائج کے مطابق مسلم لیگ (ن) کے بلال بدر چوہدری نے 93 ہزار 9 ووٹ حاصل کیے اور نمایاں برتری کے ساتھ کامیابی سمیٹی۔
بلال بدر چوہدری، وزیر مملکت طلال چوہدری کے بھائی ہیں۔

سب سے بڑا اپ سیٹ — NA-18 ہری پور

ضمنی انتخابات کا سب سے چونکا دینے والا نتیجہ ہری پور کے حلقہ این اے 18 میں سامنے آیا، جہاں سابق اپوزیشن لیڈر عمر ایوب کی اہلیہ شہرناز عمر ایوب کو مسلم لیگ (ن) کے امیدوار بابر نواز خان کے ہاتھوں شکست ہوئی۔

بابر نواز خان نے 1,63,996 ووٹ حاصل کیے، جبکہ شہرناز نے 1,20,220 ووٹ لیے۔
یہ نشست عمر ایوب کے 9 مئی کیس میں نااہل ہونے کے نتیجے میں خالی ہوئی تھی۔

صوبائی اسمبلی — (PP) حلقوں کے نتائج

PP-87 میانوالی

193 پولنگ اسٹیشنز کے نتیجے کے مطابق مسلم لیگ (ن) کے علی حیدر نور خان نیازی نے 67,986 ووٹ کے ساتھ کامیابی حاصل کی۔ آزاد امیدوار محمد ایاز خان نیازی کو صرف 3,310 ووٹ ملے۔

PP-98 فیصل آباد

فیصل آباد ون کے حلقے میں مسلم لیگ (ن) کے آزاد علی تبسم نے 44,388 ووٹ حاصل کیے، جب کہ آزاد امیدوار محمد اجمل نے 35,245 ووٹ لیے۔

PP-115 فیصل آباد

غیر حتمی نتائج کے مطابق (ن) لیگ کے محمد طاہر پرویز نے 49,049 ووٹ حاصل کیے، جبکہ آزاد امیدوار محمد اصغر 18,098 ووٹ لے سکے۔

PP-116 فیصل آباد

تمام 190 پولنگ اسٹیشنز کے نتائج کے مطابق (ن) لیگ کے احمد شہریار نے 48,824 ووٹ کے ساتھ کامیابی سمیٹی، جبکہ آزاد امیدوار ملک اصغر علی قیصر 11,429 ووٹ حاصل کر سکے۔
احمد شہریار، وزیراعظم کے مشیر رانا ثناء اللہ کے داماد ہیں۔
یہ حلقہ پی ٹی آئی کے اسمٰعیل سیلا کی نااہلی کے بعد خالی ہوا تھا۔

PP-203 ساہیوال

ساہیوال 6 میں مسلم لیگ (ن) کے محمد حنیف نے 46,900 ووٹ کے ساتھ کامیابی اپنے نام کی جبکہ آزاد امیدوار فلک شیر 10,895 ووٹ لے سکے۔

PP-73 سرگودھا

سرگودھا کے اس حلقے سے (ن) لیگ کے سلطان علی رانجھا نے 71,770 ووٹ لے کر واضح برتری کے ساتھ کامیابی حاصل کی۔ آزاد امیدوار مہر محسن رضا 12,970 ووٹ لے سکے۔

PP-269 مظفرگڑھ

اس واحد صوبائی نشست پر پیپلز پارٹی نے کامیابی حاصل کی .
پی پی پی کے میاں علمدار عباس قریشی نے 55,611 ووٹ حاصل کیے اور جیت گئے، جبکہ (ن) لیگ کو یہاں ناکامی ہوئی۔