پاکستان اسپورٹس بورڈ نے ارشد ندیم کے کوچ سلمان بٹ پر عائد پابندی ختم کرنے کا باقاعدہ فیصلہ کر دیا۔ پابندی ختم کرنے کا یہ فیصلہ پی ایس بی کے ثالث سینیٹر پرویز رشید نے دونوں فریقین کے دلائل سننے کے بعد سنایا۔
فیصلے میں کہا گیا کہ پاکستان اسپورٹس بورڈ کے ثالث نے پابندی کو غیر قانونی قرار دیا ہے۔ ساتھ ہی اسپورٹس بورڈ کی جانب سے ایتھلیٹکس فیڈریشن آف پنجاب کے انتخابات کو کالعدم قرار دینے کا فیصلہ بھی معطل کر دیا گیا۔
ثالثی فیصلے میں یہ بھی واضح کیا گیا کہ ایتھلیٹکس فیڈریشن نے سلمان بٹ کے خلاف کارروائی کے دوران قانونی تقاضے پورے نہیں کیے۔ نہ انہیں چارج شیٹ فراہم کی گئی اور نہ ہی کسی قسم کی سماعت کا مناسب موقع دیا گیا، جس سے ان کے بنیادی حقوق متاثر ہوئے۔
فیصلے میں کہا گیا کہ فیڈریشن کی جانب سے عائد پابندی نے سلمان بٹ کی ساکھ کو نقصان پہنچایا، جبکہ ارشد ندیم کے کوچ پر اس قسم کی کارروائی نے ارشد ندیم کی تیاریوں پر بھی منفی اثر ڈالا۔ پی ایس بی ایڈجیوڈیکیٹر نے ایتھلیٹکس فیڈریشن کو سلمان بٹ کے خلاف کسی بھی قسم کا بیان دینے سے بھی روک دیا۔
مزید کہا گیا کہ پنجاب ایتھلیٹکس ایسوسی ایشن کے معاملات براہ راست ایتھلیٹکس فیڈریشن کے دائرہ اختیار میں نہیں آتے۔ فیصلے کے مطابق پی اے اے کے انتخابات پنجاب اسپورٹس بورڈ اور پنجاب اولمپکس کے زیر نگرانی منعقد ہوئے تھے۔
واضح رہے کہ ایتھلیٹکس فیڈریشن آف پاکستان نے اس سے قبل سلمان بٹ پر تاحیات پابندی عائد کر دی تھی، جسے سلمان بٹ نے پی ایس بی کے آئین کے مطابق چیلنج کیا تھا۔
