پاکستان کرکٹ بورڈ نے اعلان کیا ہے کہ پی ایس ایل کا روڈ شو 7 دسمبر کو لندن میں منعقد کیا جائے گا، جس میں عالمی سرمایہ کاروں، کمرشل پارٹنرز اور شائقین کرکٹ کی بڑی تعداد کی شرکت متوقع ہے۔ ایچ بی ایل پی ایس ایل کی دو نئی ٹیموں کی فروخت کے حوالے سے تیاریاں تیز ہو چکی ہیں، اور ان ٹیموں میں برطانوی سرمایہ کاروں کی خاص دلچسپی سامنے آ رہی ہے۔
لندن میں منعقد ہونے والا یہ روڈ شو لیگ کے وژن، کمرشل ماڈل اور مستقبل کی حکمتِ عملی کو عالمی سطح پر فروغ دینے کے لیے ترتیب دیا گیا ہے۔ توقع ہے کہ پاکستان سپر لیگ کی چیمپئن لاہور قلندرز کے کپتان شاہین آفریدی اور فاسٹ بولر حارث رؤف بھی ایونٹ میں شرکت کریں گے۔
اس موقع پر چیئرمین پی سی بی محسن نقوی نے کہا کہ لارڈز میں روڈ شو کا انعقاد پاکستان کرکٹ کی عالمی شناخت کا واضح ثبوت ہے، اور یہ ایونٹ ایچ بی ایل پی ایس ایل کی بین الاقوامی اپیل کو مزید مضبوط کرے گا۔ دوسری جانب، سی ای او ایچ بی ایل پی ایس ایل سلمان نصیر کا کہنا تھا کہ پاکستانی لیگ عالمی سطح پر مضبوط فالوونگ اور مستحکم کمرشل ویلیو رکھتی ہے، جبکہ دو نئی ٹیموں کے اضافے سے سرمایہ کاروں کے لیے مزید مواقع پیدا ہوں گے۔
مزید بتایا گیا کہ 30 سپر فینز کو اس خصوصی ایونٹ میں شرکت کا موقع دیا جائے گا، اور ٹکٹوں سے متعلق تفصیلات جلد جاری کی جائیں گی۔ واضح رہے کہ ایچ بی ایل پی ایس ایل دنیا کی تیزی سے ترقی کرتی ہوئی ٹی ٹوئنٹی کرکٹ لیگز میں شمار ہوتی ہے۔
