فٹبال کے عالمی سپر اسٹار لیونل میسی کو بھارت کے معروف ارب پتی شخص اننت امبانی نے 13 لاکھ امریکی ڈالر، یعنی تقریباً 36 کروڑ 40 لاکھ پاکستانی روپے مالیت کی ایک نہایت نایاب گھڑی بطور تحفہ پیش کی ہے۔
برطانوی میڈیا کے مطابق لیونل میسی کو یہ انتہائی قیمتی گھڑی بھارت کے دورے کے دوران اننت امبانی کی جانب سے عطا کی گئی، اور اس منفرد تحفے نے کھیلوں اور سوشل میڈیا دونوں حلقوں میں خاصی توجہ حاصل کر لی ہے۔
میڈیا رپورٹس میں بتایا گیا ہے کہ میسی کو دی جانے والی اس گھڑی کے دنیا بھر میں صرف 12 نمونے تیار کیے گئے ہیں، جس کے باعث اس کی قدر اور اہمیت میں مزید اضافہ ہو جاتا ہے۔
اس خصوصی گھڑی میں بلیک کاربن فائبر کیس اور اسکیلیٹن ڈائل شامل ہے، جو اس کے اندرونی میکانزم کو واضح طور پر نمایاں کرتا ہے۔ تحفے کے بعد لیونل میسی کی اس گھڑی کے ساتھ تصاویر سوشل میڈیا پر تیزی سے وائرل ہو رہی ہیں، جنہیں دنیا بھر میں شائقین کی جانب سے بے حد پسند کیا جا رہا ہے۔
