ملک میں سیمنٹ کی ریٹیل قیمتوں میں گزشتہ ہفتے کے دوران اضافہ دیکھنے میں آیا ہے۔ پاکستان بیورو برائے شماریات کے مطابق 18 دسمبر کو ختم ہونے والے ہفتے میں ملک کے شمالی شہروں میں سیمنٹ کی فی بوری اوسط ریٹیل قیمت 1402 روپے ریکارڈ کی گئی، جو پیوستہ ہفتے کے مقابلے میں 0.9 فیصد زیادہ ہے۔ اس سے قبل شمالی شہروں میں سیمنٹ کی فی بوری اوسط قیمت 1389 روپے تھی۔
اسی طرح جنوبی شہروں میں بھی سیمنٹ کی قیمتوں میں معمولی اضافہ سامنے آیا ہے۔ اعداد و شمار کے مطابق 18 دسمبر کو ختم ہونے والے ہفتے میں جنوبی شہروں میں سیمنٹ کی فی بوری اوسط ریٹیل قیمت 1446 روپے ریکارڈ کی گئی، جو گزشتہ ہفتے کے مقابلے میں 0.06 فیصد زیادہ ہے، جبکہ پیوستہ ہفتے میں یہ قیمت 1445 روپے تھی۔
اعداد و شمار کے مطابق گزشتہ ہفتے اسلام آباد میں سیمنٹ کی فی بوری اوسط ریٹیل قیمت 1367 روپے، راولپنڈی میں 1361 روپے، گوجرانوالہ میں 1450 روپے، سیالکوٹ میں 1420 روپے، لاہور میں 1488 روپے، فیصل آباد میں 1390 روپے، سرگودھا میں 1397 روپے، ملتان میں 1451 روپے، بہاولپور میں 1440 روپے، پشاور میں 1353 روپے جبکہ بنوں میں 1300 روپے ریکارڈ کی گئی۔
اسی طرح جنوبی علاقوں میں کراچی میں سیمنٹ کی فی بوری اوسط ریٹیل قیمت 1378 روپے، حیدرآباد میں 1428 روپے، سکھر میں 1530 روپے، لاڑکانہ میں 1407 روپے، کوئٹہ میں 1490 روپے اور خضدار میں 1443 روپے ریکارڈ کی گئی۔
