لاہور: وزیراعلیٰ پنجاب مریم نواز نے کرسمس کے موقع پر مسیحی ملازمین کے لیے ایک تنخواہ بطور بونس دینے کا اعلان کیا ہے، جس کا مقصد اقلیتی برادری کی خوشیوں میں شمولیت اور ان کی خدمات کا اعتراف کرنا ہے۔
الحمرا آرٹس کونسل لاہور میں کرسمس کی مناسبت سے ایک تقریب منعقد کی گئی، جس میں وزیر اطلاعات و ثقافت پنجاب عظمیٰ بخاری بطور مہمان خصوصی شریک ہوئیں اور تقریب میں مسیحی ملازمین کی بڑی تعداد نے شرکت کی۔
صوبائی وزیر اطلاعات عظمیٰ بخاری نے وزیراعلیٰ پنجاب مریم نواز کی جانب سے مسیحی ملازمین میں تحائف تقسیم کیے، جبکہ انہوں نے مسیحی ملازمین کے ہمراہ کرسمس کا کیک بھی کاٹا اور تہوار کی خوشیوں میں ان کے ساتھ بھرپور انداز میں شریک ہوئیں۔
اس موقع پر عظمیٰ بخاری کا کہنا تھا کہ کرسمس کے تہوار پر مسیحی بہن بھائیوں کی خوشیوں میں برابر کے شریک ہیں، انہوں نے کہا کہ اقلیتیں وزیراعلیٰ پنجاب کے دل کے بہت قریب ہیں اور حکومت ان کے حقوق اور فلاح کو ترجیح دیتی ہے۔
انہوں نے مزید کہا کہ مسیحی ملازمین پنجاب حکومت کا فخر ہیں اور ان کی خدمات قابلِ ستائش ہیں، جبکہ پنجاب حکومت اقلیتوں کے تحفظ، فلاح و بہبود اور خوشحالی کے لیے تمام ممکن وسائل بروئے کار لا رہی ہے۔
